वीरगञ्ज । पर्सा जिल्लाका १४ वटा स्थानीय तहमध्ये १३ वटाको मतपरिणाम सार्वजनिक भइसकेको छ । मतपरिणाम सार्वजनिक भइसकेको स्थानीय तहमध्ये सबैभन्दा बढी स्थानीय तहमा नेकपा एमाले बिजयी भएको छ । नेकपा एमालेले ५ वटा स्थानीय तहमा जित निकाल्दा नेपाली कांग्रेसले ४ वटा, जनता समाजवादी पार्टी (जसपा) ले ३ वटा र लोकतान्त्रिक समाजवादी पार्टी (लोसपा) ले १ वटा स्थानीय तहमा जित हाँसिल गरेको छ ।

एमालेले २ नगरपालिका र ३ गाउँपालिका जित्दा कांग्रेसले ४ गाउँपालिकामा जितेको छ । जसपा १ नगरपालिकासहित २ वटा गाउँपालिकामा बिजयी हुँदा १ गाउँपालिकामा लोसपाले जित हाँसिल गरेको हो ।

पर्साको पर्सागढी नगरपालिका, पोखरिया नगरपालिका, ठोरी, छिपहरमाई र सखुवाप्रसौनी गाउँपालिकामा नेकपा एमालेले जितेको छ । जिराभवानी, पकाहमैनपुर, जगरनाथपुर र पटेर्वासुगौली गाउँपालिकामा कांग्रेसले जितेको छ । बहुदरमाई नगरपालिकासहित धोबिनी र कालिकामाई गाउँपालिकामा जसपाले जित्दा बिन्दवासिनी गाउँपालिकामा लोसपाले जित निकालेको हो ।

२०७४ सालमा भएको स्थानीय तहको निर्वाचनमा जगरनाथपुर, छिपहरमाई र ठोरी गरी ३ वटा गाउँपालिका जितेको नेकपा माओवादी केन्द्रले यसपटक एक वटा स्थानीय तह पनि जित्न सकेन । माओवादी केन्द्रबाट निर्वाचित भएका छिपहरमाई गाउँपालिकाका मनोज कुमार गुप्ता भने यसपटक नेकपा एमालेबाट पुनः निर्वाचित भएका छन् । उनी हाल एमालेको पर्सा जिल्ला सचिवसमेत हुन् । उपाध्यक्षमा नेपाली कांग्रेसकी लिलावति देवी कानु निर्वाचित हुँदा ३ वडामा कांग्रेस र २ वडामा एमालेले जितको छ ।

त्यस्तै माओवादी केन्द्रबाटै निर्वाचित जगरनाथपुर गाउँपालिकाका जालिम मियाँ मन्सुरीले पनि एमालेबाट प्रतिनिधि सभा लड्ने मनसायका साथ आफ्ना भाई सलिम मियाँ मन्सुरीलाई लडाएपनि उनी पराजित भएका छन् । जगरनाथपुर गाउँपालिकाको अध्यक्षमा कांग्रेसका श्रीकान्त प्रसाद यादव र उपाध्यक्षमा कांग्रेसकी बबिता सिंह निर्वाचित भएकी छिन् । त्याहाँ ४ वडामा कांग्रेस र २ वडामा एमालेले जित निकालेको छ ।

नेकपा माओवादी केन्द्रको गढ मानिएको ठोरी गाउँपालिकामा पनि निवर्तमान अध्यक्ष पदमलाल (पिएल) श्रेष्ठ नेकपा एमालेकै लालबहादुर श्रेष्ठसँग पराजित भएका छन् । ठोरीमा अध्यक्ष, उपाध्यक्षसँगै ३ वटा वडामा पनि एमालेले जित हाँसिल गरेको छ भने १/१ वटा वडामा कांग्रेस र माओवादी केन्द्रले जितेको छ ।

पर्सागढी नगरपालिकामा पनि नगरप्रमुख, उपप्रमुखसँगै २ वडामा एमालेले जितेको छ । एमालेका गोकर्ण पाठक प्रमुख र उपप्रमुखमा पुजा चौधरीसँगै ३ वडामा कांग्रेस, २ वडामा जसपा र १/१ वटा वडामा स्वतन्त्र र लोसपाले जित हाँसिल गरेका छन् ।

जिल्लाको दोस्रा सदरमुकामको रुपमा परिचित पोखरिया नगरपालिकाको प्रमुखमा पनि नेकपा एमालेकै प्रदुमन प्रसाद चौहान निर्वाचित हुँदा उपप्रमुखमा पनि एमालेकै रुवी कुमारी ठाकुर बिजयी भएकी छिन् । ४ वडामा एमालेले जित्को पोखरियाका ५ वडामा कांग्रेस र १ वडामा नेपाल सुशासन पार्टीले जित निकालेको छ । बहुदरमाई नगरपालिकाको प्रमुखमा जसपाका सिंगासन साह तेली र उपप्रमुखमा एमालेकी सुष्मा कुमारी कुशवाहा निर्वाचित भएकी छिन् । त्याहाँ ४ वडामा कांग्रेसले जितेको छ भने ३ वडामा एमाले, जसपा र स्वतन्त्रबाट १/१ वडा हात पारेका छन् ।

नेपाली कांग्रेसका सुरेश प्रसाद अध्यक्षमा निर्वाचित भएका पकाहमैनपुर गाउँपालिकाको उपाध्यक्षमा पनि कांग्रेसकै सरफुन नेशा बिजयी भएकी छिन् । पकाहमैनपुरका पाँचै वडामा पनि नेपाली कांग्रेस बिजयी भएको हो ।

जसपाबाट २१ वर्षीय बशिष्ट कुमार अध्यक्षमा निर्वाचित भएको कालिकामाई गाउँपालिकाको उपाध्यक्षमा नेपाली कांग्रेसकी ६१ वर्षीय राजमति बरैनी निर्वाचित भएकी छिन् । ३ वडामा जसपा र १/१ वटा वडामा एमाले र कांग्रेसले जित हाँसिल गरेका छन् ।

जसपाबाट मदन प्रसाद चौहानले अध्यक्षमा जितेको धोबिनी गाउँपालिकाको उपाध्यक्षमा कांग्रेसकी मंजु देवी बिजयी भएकी छिन् । त्याहाँ ३ वडामा कांग्रेस २ वडामा जसपा बिजयी भएको छ ।

सखुवाप्रसौनी गाउँपालिकाको अध्यक्षमा पनि नेकपा एमालेकै ३२ वर्षीय जसवन्त यादव बिजयी भएका छन् भने उपाध्यक्षमा जसपाकी शर्मिला बिष्ट निर्वाचित भएकी हुन् । ६ वडा रहेको सखुवाप्रसौनीमा एमाले, कांग्रेस र जसपा २/२ वडामा बिजयी भएका छन् ।

पटेर्वासुगौली गाउँपालिकाको अध्यक्षमा नेपाली कांग्रेसका दिनेश कुमार चौधरी निर्वाचित हुँदा उपाध्यक्षमा पनि कांग्रेसकै ममता महतो पुनः दोहोरिएकी छिन् । ४ वडामा कांग्रेसले जितेको पटेर्वासुगौलीमा १ वडामा मात्रै एमाले जित्न सफल भएको छ ।

जिराभवानी गाउँपालिकामा पनि कांग्रेसकै ३१ वर्षीय अनोज चौधरी अध्यक्षमा निर्वाचित भएका छन् । उपाध्यक्षमा पनि कांग्रेसकै ३१ वर्षीय रेखा चौधरी निर्वाचित भएकी छिन् । त्याहाँ ३ वटा वडामा कांग्रेसले जित्दा २ वडामा एमालेले जित निकाले छ । लोसपाले जितेको एक मात्र स्थानीय तह बिन्दवासिनी गाउँपालिका हो । जुन पालिकाको अध्यक्षमा प्रमोद तिवारी निर्वाचित भएका छन् भने उपाध्यक्षमा नेकपा एमालेकी ज्योतिदेवी चौरसिया निर्वाचित भएकी छिन् । ३ वडामा कांग्रेसले जितेको बिन्दवासिनीमा नेकपा माओवादी केन्द्र र जसपाले १/१ वटा वडामा जित्न सफल भएका छन् ।

वीरगञ्ज महानगरपालिकामा भने अहिले मत गणना जारी छ । हालसम्मको तथ्यांकअनुसार पाँच दलीय गठबन्धनबाट जसपाका राजेशमान सिंह नेकपा एमालेका बिजय कुमार सरावगीभन्दा झण्डै १२ हजारभन्दा बढी मतले अगाडी छन् । यस हिसावले मधेश प्रदेशको एक मात्र महानगरपालिका जसपाले जित्ने प्रबल सम्भावना देखिएको छ ।