वीरगञ्ज । वीरगञ्ज महानगरपालिकाको वडाध्यक्षमा जितेपछि नेपाली कांग्रेसले निकालेको विजयी र्यालीमा एमालेका कार्यकर्ताहरुले आक्रमण गरेका छन् । एमाले कार्यकर्ताको आक्रमणबाट ६ जना घाईते भएका छन्। महानगरपालिकाको वडा नम्बर २७ को वडाध्यक्षमा कांग्रेसका हृदय नारायण कुर्मी १ हजार ५१६ मत ल्याएर विजयी भएका थिए । उनले निवर्तमान वडाध्यक्ष प्रदिपप्रसाद यादवलाई ४०५ मत अन्तरले हराएका थिए। यादवले १ हजार ११६ मत ल्याएका थिए । बिहीबार राति वडाध्यक्षमा जितेपछि राति नै गाउँमा विजयी र्याली निकालेर गईरहेको बेला एमालेका कार्यकर्ताहरुले आक्रमण गरेका थिए ।

निवर्तमान वडाध्यक्ष यादवसहितका कार्यकर्ताहरुले लाठीसहित विजयी जुलुसमा सहभागी भएकाहरु मथि आक्रमण गरी घाईते बनाएको कांग्रेसको आरोप छ । एमाले कार्यकर्ताहरुले लाठी आक्र्रमण गर्दा वडा नम्बर २७ कै ५८ वर्षीया नेमा रेशा, ३० वर्षीया आयसा भन्ने मुन्नी खातुन, ४० वर्षीय मलिक नुनिया, १८ वर्षीय मोहमद नुराइन, ४२ वर्षीय मोहमद मियाँ र १९ वर्षीय जाहिर हवारीको टाउकोमा चोट लागेको छ ।

उनीहरुमध्ये चार जना उपचार पछि घर फर्केका छन् । बाँकी दुई जना महम्द मियाँ र आयशा खातुनको नारायणी अस्पतालमै उपचार भईरहेको पर्सा प्रहरीले जनाएको छ । घटना भएको थाहा पाउने बितिक्कै घटनास्थलमा पुगेको प्रहरीले स्थिती नियन्त्रणमा लिएको थियो । आक्रमणका संलग्न भएको आरोपमा निवर्तमा वडाध्यक्ष प्रदिपप्रसाद यादव, नुर महम्द र शर्मा प्रसाद क्शवाहालाई सोधपुछका लागि नियन्त्रणमा लिएको पर्साका प्रहरी प्रवक्ता एवंम् डिएसपी ओमप्रकाश खनालले जानकारी दिए ।