वीरगञ्ज, ५ जेठ । पर्सा जिल्लाका १४ वटा स्थानीय तहमध्ये हालसम्म सार्वजनिक मतपरिणामअनुसार पुराना जनप्रतिनीधिबाट जनता असन्तुष्ट रहेको स्पष्ट भएको छ । पदमा रहँदा र अवसर पाएको बेलामा पनि जनताको मन जित्न नसकेका जनप्रतिनीधिलाई जनताले पुनः अवसर दिन नचाहेको पर्सा जिल्लाको मतपरिणामले बताउँछ ।

पर्सामा सबैभन्दा पहिला मतपरिणाम सार्वजनिक भएको जिराभवानी गाउँपालिकाका निवर्तमान अध्यक्ष नेकपा एमालेका रामप्रित महतो १ हजार २ सय ६१ मतको फराकिलो अन्तरले पराजित भए । गत निर्वाचनमा पराजित भएका नेपाली कांग्रेसका महादेव प्रसाद महतो थारुका छोरा अनोज चौधरीसँग रामप्रित पराजित भएका हुन् । अनोजले ४ हजार ५ सय ६० मत ल्याउँदा रामप्रित ३ हजार २ सय ९९ मतमै समेटिए ।

बिन्दवासिनी गाउँपालिकाका निवर्तमान अध्यक्ष जनता समाजवादी पार्टी (जसपा) का श्रीलाल साह कानु १ हजार ४ सय ६० मतान्तरले लोकतान्त्रिक समाजवादी पार्टी (लोसपा) का प्रमोद तिवारीसँग पराजित भए । तिवारीले २ हजार २ सय ३४ मत पाउँदा कानु ७ सय ७४ मतमै सिमित भए । गत निर्वाचनमा कानु नेपाली कांग्रेसका चन्द्रकिशोर प्रसाद बरैसँग ८ मतले बिजयी भएका थिए । गत निर्वाचनमा राष्ट्रिय जनता पार्टी (राजपा) बाट अध्यक्षमा उम्मेदवारी दिएका लक्ष्मणप्रसाद चौरसियाकी श्रीमती ज्योतिदेवी चौरसिया यसपटक नेकपा एमालेबाट उपाध्यक्षमा निर्वाचित भएकी छिन् ।

पर्सा जिल्लाको दोस्रो सदरमुकामको रुपमा परिचित पोखरिया नगरपालिकाका निवर्तमान मेयर दिपनारायण रौनियार पनि २ हजार ४ सय ३३ मतले हार बेहोरे । गत निर्वाचनमा नेपाली जनता दलबाट निर्वाचित भएका रौनियार अहिले नेपाली कांग्रेसबाट उम्मेदवार बनेका थिए । उनी नेकपा एमालेका प्रधुमन प्रसाद चौहानसँग पराजित भएका हुन् । प्रधुमन तत्कालिन संघिय समाजवादी फोरमबाट चुनाव लडेर पराजित भएका थिए । निर्वाचनअघि रौनियारले स्थानीय टेलिभिजनको कार्यक्रममा आफु १ हजारभन्दा बढी मतले बिजयी हुने दावीसमेत गरेका थिए ।

पर्सागढी नगरपालिकाका निवर्तमान मेयर लोकनारायण यादव पनि २ हजार ८ सय ९१ मतको फराकिलो अन्तरले पराजित भए । गत निर्वाचनमा नेपाली कांग्रेसबाट ६७ मतले बिजयी भएका यादवलाई यसपटक उनकै प्रतिद्वन्द्वी नेकपा एमालेका गोकर्ण पाठकले फराकिलो मतान्तरले पराजित गरेका हुन् । पाठकले ६ हजार ६ सय २४ मतका साथ पर्सागढीको प्रमुखमा निर्वाचित भएका छन् ।

पटेर्वासुगौली गाउँपालिका निवर्तमान अध्यक्ष हरिनारायण चौधरीले पनि लज्जास्पद हार बेहोरे । गत निर्वाचनमा ८२ मतले पराजित भएका नेपाली कांग्रेसका दिनेश कुमार चौधरीले यसपटक नेकपा एमालेका हरिनारायणलाई २ हजार मतको फराकिलो मतले पराजित गरे । हरिनारायण ३ हजार ९ सय ४४ मतमै सिमित हुँदा दिनेशले ५ हजार १ सय ४४ मत प्राप्त गरेका छन् ।

नेकपा माओवादी केन्द्रका पदमलाल (पिएल) श्रेष्ठले जितेको ठोरी गाउँपालिकामा यसपटक नेकपा एमालेका लालबहादुर श्रेष्ठ निर्वाचित भएका छन् । पर्सा जिल्लामै माओवादी केन्द्रको सबैभन्दा बलियो पकड भएको मानिने ठोरीमा एमालेले जितेसँगै माओवादीको किल्ला भत्किएको छ । गत निर्वाचनमा पिएलसँग ४ सय ३४ मतान्तरले पराजित भएका दिनेशले यसपटक पिएललाई ७ सय २० मतले हराएका छन् ।

पकाहमैनपुर गाउँपालिकाबासी पनि जसपाबाट निर्वाचित अध्यक्ष बिजय कुमार चौरसियाको कामबाट सन्तुष्ट नरहेको मतपरिणामले बताउँछ । यसअघि १ सय ८१ मतले पराजित भएका नेपाली कांग्रेसका सुरेश प्रसादलाई गाउँबासीले अवसर दिएका छन् । सुरेशले ४ हजार ६ सय ८५ मत पाउँदा निवर्तमान अध्यक्ष चौरसियाले २ हजार ५ सय २९ मत प्राप्त गरे ।

धोबिनी गाउँपालिकामा भने निवर्तमान अध्यक्षा नेपाली कांग्रेसका सुरेश प्रसाद कुर्मीका दाई बशिष्ट नारायण प्रसाद कुर्मीलाई पार्टीलाई टिकट दियो । तर बशिष्ट जसपाका मदनप्रसाद चौहानसँग २१ मतले पराजित भए । मदन गत निर्वाचनमा जसपाबाट अध्यक्षमा उम्मेदावरी दिएर दोस्रो स्थानमा रहेकी सुशिला देवीका श्रीमान हुन् ।

बहुदरमाई नगरपालिकाका निवर्तमान मेयर नेपाली कांग्रेसका नितेन्द्र प्रसाद साह पनि ४ सय ८८ मतले पराजित भएका छन् । गत निर्वाचनमा स्वतन्त्रबाट लडेर चौथो स्थानमा रहेका र अहिले जसपाबाट लडेर बिजयी भएका सिंगासन साह तेलीसँग नितेन्द्र पराजित भएका हुन् । नितेन्द्र ५ हजार ५ सय १६ मतका साथ तेस्रो स्थानमा रहँदा ६ हजार ४ मत पाएर तेली निर्वाचित भएका हुन् ।

पर्साको जगरनाथपुर गाउँपालिकाका निवर्तमान अध्यक्ष जालिम मियाँ मनसुरीले आफु प्रतिनिधि सभा सदस्यमा लड्ने मनसाय बनाएकाले यसपटक आफ्ना भाई महमद सलिम मनसुरीलाई नेकपा एमालेबाट उम्मेदवार बनाए । गत निर्वाचनमा नेकपा माओवादी केन्द्रबाट निर्वाचित जालिमले यसपटक एमालेबाट भाई सलिमलाई उम्मेदवार बनाएपनि उनी १ हजार ८ सय २३ मतको फराकिलो अन्तरले पराजित भएका छन् । गत निर्वाचनमा तेस्रो स्थानमा रहेका नेपाली कांग्रेसका श्रीकान्त प्रसाद यादव ५ हजार ७ सय ४९ मतका साथ अध्यक्षमा निर्वाचित भएसँगै जगरनाथपुरमा पञ्चायती व्यवस्थादेखि कायम रहेको जालिम मियाँको बिरासत सकिएको छ ।

सखुवाप्रसौनी गाउँपालिकामा पनि निवर्तमान अध्यक्ष जसपाका प्रदीप कुमार जैसवाल पनि यसपटक पराजित भएका छन् । गत निर्वाचनमा स्वतन्त्रबाट उम्मेदवारी दिएका जसवन्त यादवले निवर्तमान अध्यक्ष जैसवाललाई १ हजार ८ सय ३१ मतान्तरले पराजित गरेका हुन् । यादवले ६ हजार ४ सय ४१ मत पाउँदा जैसवालले ४ हजार ८ सय १० मत पाएका छन् ।

कालिकामाई गाउँपालिकाका निवर्तमान अध्यक्ष नथुनी कुशवाहले कोरोना संक्रमणका कारण ज्यान गुमाए । तत्कालिन संघिय समाजवादी फोरमबाट उपाध्यक्षमा निर्वाचित भएका राजेश कुमार चौरसियालाई जसपाले टिकट नदिएपछि एमालेबाट अध्यक्षमा लडेका थिए । १ हजार ३ सय १७ मत पाएर चौरसिया तेस्रो स्थानमा रहे भने त्याहाँ जसपाबाट २१ वर्षीय बशिष्ट कुमार गुप्ता निर्वाचित भएका छन् । गुप्ता गत निर्वाचनमा अध्यक्षमा दोस्रो स्थानमा रहेकी लालसा देवी कलवारका भतिजा हुन् ।

पर्साको छिपहरमाई गाउँपालिकाका अध्यक्ष मनोज कुमार गुप्ता भने पुनः दोहोरिएर भाग्यमानी निवर्तमान बनेका छन् । जिल्लाका १४ वटै स्थानीय तहमध्ये वडाअध्यक्षमा अधिकांश दोहोरिएपनि पालिका प्रमुखमा दोहोरिने एक मात्र भाग्यमानी जनप्रतिनिधि गुप्ता हुन् ।

वीरगञ्ज महानगरपालिकामा पनि निवर्तमान मेयर बिजय कुमार सरावगी पाँच दलीय गठबन्धनबाट जसपाका राजेशमान सिंहभन्दा धेरै पछाडी छन् । ३२ वटा वडामध्ये १५ वटा वडाको गणना हुँदासम्म सरावगी झण्डै ११ हजारभन्दा बढी मतले पछाडी रहेको हुँदा उनी पनि पुनः दोहोरिने अवस्था देखिदैन ।