वीरगञ्ज । पञ्चायत कालदेखिनै विभिन्न तरिकाले राजनीतिक पद अगोटदै आएको पर्साको मियाँ परिवारले स्थानीय तह निर्वाचनमा आफ्नो उम्मेदवार हार्ने संकेत देखेपछि मतगणना स्थगित गर्न गरेको षडयन्त्र असफल भएको छ । जगरनाथपुर गाउँपालिकाको मतपेटिकामा निर्वाचन अधिकृतले हस्ताक्षर नगरेको मतपत्र भेटिएको भन्दै मियाँ परिवारले मंगलबार दिउँसोदेखि स्थगित गरेको मतगणना बुधबार दिउँसोबाट पुन: सुरु भएको छ । आफ्नो उम्मेदवार हार्ने संकेत देखेपछि मियाँ परिवारले गाउँपालिकाको मतगणना स्थगित गर्ने गरेको षडयन्त्रमाथि निर्वाचन आयोगले पानी खन्याई दिएको हो ।

मियाँ परिवारका प्रमुख एवम् जगरनाथपुर गाउँपालिकाका निवर्तमान अध्यक्ष जालिम मियाँले आज वीरगञ्जमा पत्रकार सम्मेलन गर्दै नेकपा एमालेले जागरनाथपुर गाउँपालिकाको मतगणना बहिष्कार गर्ने जनाएका थिए । मतगणनामा धाँधली भएको बताउँदै उनले पत्रकार सम्मेलन गरेर सुरुदेखि मतगणना गराउनु पर्ने माग राखेका थिए । तर उनको मागलाई वेवास्ता गर्दै निर्वाचन आयोगले मतगणना सुरु गर्न निर्देशन दिएको छ । अघिल्लो निर्वाचनमा नेकपा माओवादी केन्द्रबाट जगरनाथपुरको अध्यक्ष जितेका मियाँले यस पटक आफ्नो भाई महमद सलिम मन्सुरलाई नेकपा एमालेबाट उम्मेदवार बनाएका छन् । मियाँ आफ्नो पूरा परिवारसहित केहि महिना अगाडि माओवादी त्याग्दै एमाले प्रवेश गरेका थिए ।

तर, निर्वाचनमा मतपरिणाम आफ्नो पक्षमा आउने संकेत नदेखेपछि मियाँ परिवारले मतगणना बहिष्कार गर्ने षडयन्त्र गरेको नेपाली कांग्रेसबाट गाउँपालिका अध्यक्ष उम्मेदवार श्रीकान्त यादवले आरोप लगाएका छन् । मतगणनाको परिणाम हेर्दा पनि मियाँका भाई मन्सुर जित्ने संकेत देखिंदैन । गाउँपालिकाको वडा नम्बर १ र २ मा नेपाली कांग्रेसका उम्मेदवार निर्वाचित भइसकेका छन् । पाँच वडा रहेको गाउँपालिकाको वडा नम्बर ३ मा पनि कांग्रेसले अग्रात लिरहेको छ । वडा नम्बर ३ मा मियाँको गृहगाउँ पर्छ । त्यहाँ ११ सय वटा मत गणना गर्दा उनका भाई ३ सय मतले पछाडि रहेका छन् ।

दुई वडामा पछाडि परेपनि वडा नम्बर ३ आफ्नो गृहवडा भएकोले कांग्रेस र जसपालाई पछी पर्ने मियाँको सोच थियो । तर, वडामा आधाभन्दा बढी मत गणना हुँदासमेत पनि कांग्रेसका उम्मेदवारले अनपेक्षित मतले लिड गरेपछि उनले निर्वाचनमा धाँधली भएको आरोप लगाएको कांग्रेसका उम्मेदवार यादवको भनाई छ । अर्को तिर आफ्नै वडामा पछि परेपछि यसपछिका वडामा मियाँका भाईले लिड गर्न सक्ने सम्भावना अत्यन्तै न्युन देखिएको छ । यसपछिका वडा नेपाली कांग्रेसका केन्द्रिय सदस्य रमेश रिजाल र जिल्ला सभापति जनार्दन सिंह क्षेत्रका गाउँ पर्ने भएकाले पनि एमालेले हार्ने लगभग पक्कापक्की छ ।

जसपाबाट अध्यक्षका उम्मेदवार कृष्णमोहन यादवको वडामा पनि कांग्रेसले जितेको छ । कृष्णमोहनको वडा नम्बर २ मा कांग्रेसका नेपाली कुशवाहा विजयी भएका हुन् । आफ्नो गृहवडामा हार व्यहोरेपछि जसपाले पनि मियाँलाई मतगणना वारिष्कार गर्नमा साथ दिएका थिए । हालसम्मको गणनामा कांग्रेसका श्रीकान्त यादवले १ हजार ८ सय २५ मत, जसपाका कृष्णमोहन यादवले १ हजार ७ सय २५ मत र एमालेका मन्सुरले १ हजार ३ सय ३५ मत प्राप्त गरेका छन् । गाउँपालिकाका निर्वाचन अधिकृत चिन्तामणी शर्माले यसअघि रोकिएको मतगणना निर्वाचन आयोगको निर्देशनअनुसार पुनः सुचारु भइसकेको जनाएका छन् ।