सुर्खेत । ७९ वटा स्थानीय तह रहेको कर्णाली प्रदेशमा समाचार तयार पार्दासम्म ४० पालिकाको नतिजा सार्वजनिक भएको छ । मंगलबार दिउँसो १ बजेसम्मको परिणाम अनुसार ४० पालिकाको नतिजा सार्वजनिक भइसकेको निर्वाचन आयोगको कर्णाली प्रदेश कार्यालयले जनाएको छ । प्रदेशमा हालसम्म सार्वजानिक नजिता अनुसार नेपाली कांग्रेसले अग्रता लिएको छ । कांग्रेसले सबैभन्दा बढी १८ वटा पालिका प्रमुख जितेको छ भने दोस्रोमा माओवादी केन्द्र रहेको छ । माओवादी केन्द्रले १३ पालिका प्रमुखमा जितेको छ ।

यस्तै नेकपा एमालेले पाँचवटा पालिकामा जित हात पारेको छ भने नेकपा (एकीकृत समाजवादी)ले तीन वटा पालिकामा नेतृत्व पाएको छ । एकजना स्वतन्त्र उम्मेदवार जिजयी भएका छन् । उनी एकीकृत समाजवादी कालीकोटका उपाध्यक्षसमेत हुन् । १० जिल्लामध्ये अहिलेसम्म सुर्खेतका कुनै पनि पालिकाको मत गणना सकिएको छैन् । ०७४ सालमा एउटा वडाध्यक्षसमेत नजितेको माओवादीले दैलेखमा दुई पालिका अध्यक्ष जितेको छ ।

एमालेले दैलेखमा आफ्नो वर्चश्व रहेको भैरवी, भगवती र महाबु गाउँपालिकाको नेतृत्व यसपटक गुमाएको छ । कांग्रेसले यसअघि जितेको गुराँस र डुङ्गेश्वर गाउँपालिकामा यो पटक एमालेले जितेको छ । कांग्रेसले जितेको नौमुले गाउँपालिका माओवादीले जितेको छ ।

माओवादीको आधार इलाका मानिएको रुकुम पश्चिमका दुई गाउँपालिकामा नेपाली कांग्रेसले जितेको छ । ६ स्थानीय तह रहेको रुकुम पश्चिममा ०७४ को स्थानीय निर्वाचनमा ६ वटै पालिकामा माओवादीले जितेको थियो ।

अहिलेसम्म बाँफिकोट गाउँपालिकामा नेपाली कांग्रेसले जितेको छ । माओवादीका प्रभावशाली नेता जनार्दन शर्माको गृहनगर मुसिकोटमा पनि कांग्रेसले शुरुआतदेखि नै अग्रता लिएको छ । एमालेबाट विभाजन भएको एकीकृत समाजवादीले डोल्पाका दुई र सल्यानको एक पालिकामा नजिता निकालेको छ ।

यसअघि माओवादीले वर्चश्व जमाएको कालीकोटको तिलागुफामा एमाले-कांग्रेस मिलेर पराजित गरेका छन् । अन्य पालिकाहरू पनि माओवादीले गुमाएको छ । ०७४ मा निर्वाचित भएर पाँच वर्षे कार्यकाल चलाएका अधिकांश उम्मेदवारहरू यो पटकको चुनावमा पराजय बेहोरेका छन् ।

कर्णालीमा पाँच दलीय गठबन्धन क्षतविछेद् छ । अधिकांश पालिकामा गठबन्धन कायम हुन सकेन् । माओवादी बलियो भएका रुकुम, सल्यान, कालीकोटलगायत जिल्लामा एमाले-कांग्रेस गठबन्धन छ । यसबाहेक कांग्रेस-माओवादी, एकीकृत समाजवादी-माओवादी र एमाले- एकीकृत समाजवादीको तालमेल रहेको छ ।

यी हुन् कांग्रेसले जितेका १८ पालिका
– ठूलोभेरी नगरपालिका, डोल्पा
-तिलागुफा नगरपालिका, कालीकोट
– महाबु गाउँपालिका, दैलेख
-भैरवी गाउँपालिका, दैलेख
– चामुण्डा विन्द्रासैन नगरपालिका, दैलेख
– ठाँटीकाँध गाउँपालिका, दैलेख
– खार्पुनाथ गाउँपालिका, हुम्ला
– कुमाख गाउँपालिका, सल्यान
-सिद्धकुमाख गाउँपालिका, सल्यान
– त्रिवेणी गाउँपालिका ,सल्यान
– शारदा नगरपालिका, सल्यान
-कनकासुन्दरी गाउँपालिका, जुम्ला
– पातारासी गाउँपालिका,जुम्ला
– हिमा गाउँपालिका, जुम्ला
– मुगुम कार्मारोंग गाउँपालिका, मुगु
-कुशे गाउँपालिका, जाजरकोट
– शिवालय गाउँपालिका, जाजरकोट
– बाँफिकोट गाउँपालिका, रुकुम पश्चिम

माओवादीले जितेका १३ पालिका
– नौमुले गाउँपालिका, दैलेख
-भगवतीमाई गाउँपालिका, दैलेख
-ताँजाकोट गाउँपालिका, हुम्ला
– नाम्खा गाउँपालिका,हुम्ला
– सिमकोटमा गाउँपालिका, हुम्ला
– पलाँता गाउँपालिका , कालीकोट
– शुभ कालीका गाउँपालिका, कालीकोट
– जगदुल्ला गाउँपालिका, डोल्पा
– मुड्केचुला गाउँपालिका, डोल्पा
– नलगाड नगरपालिका, जाजरकोट
-बनगाड कुपिण्डे नगरपालिका, सल्यान
– सानीभेरी गाउँपालिका, रुकुम पश्चिम
-सिंजा गाउँपालिका, जुम्ला

एमालेले जितेका ५ पालिका
– गुराँस गाउँपालिका, दैलेख
-डुङ्गेश्वर गाउँपालिका , दैलेख
– नारायण नगरपालिका, दैलेख
– शे-फोक्सुण्डो गाउँपालिका, डोल्पा (निर्विरोध)
– जुनिचाँदे गाउँपालिका, जाजरकोट
एकीकृत समाजवादीले जितेका ३ पालिका
– काइके गाउँपालिका, डोल्पा (निर्विरोध)
– छार्काताङसोङ गाउँपालिका , डोल्पा (निर्विरोध)
-कपुरकोट गाउँपालिका, सल्यान

स्वतन्त्र -१
-खाँडाचक्र नगरपालिका, कालीकोट