वीरगन्ज । वीरगन्ज महानगरपालिकाको उपप्रमुख पदकी स्वतन्त्र उमेदवार रम्भा मिश्राले उपप्रमुखको मतगणनाकार्य रद्द गर्न माग गरेकी छन् । उपप्रमुखको लगभग ६० प्रतिशत मत बदर भएको भन्दै उनले पत्रमार्फत निर्वाचन आयोगलाई गणना रद्द गर्न आग्रह गरेकी हुन् ।

मतदाता शिक्षाको अभावमा धेरै मत बदर भएको उनको ठहर छ । उपप्रमुखको मतगणना रद्द गरेर मतदाता शिक्षा सञ्चालन गरी पुनः मतदान गराउन उनले अनुरोध गरेकी छन् ।

उनले लोकतान्त्रिक समाजवादी पार्टी (लोसपा)बाट उपप्रमुखमा प्रतिस्पर्धा गर्ने तयारी गरेकी थिइन् । सोहीअनुसार लोसपाको साइकल चुनाव चिह्नमा मत समेत माग्दै आएकी थिइन् । पार्टीबाट टिकट नपाएपछि अन्तिममा स्वतन्त्र उमेदवारी दिइन् ।

गएको वैशाख १७ गते उनलाई निर्वाचन आयोगले गुलाफको फुल चुनाव चिह्न दिएको थियो ।