जनकपुर । चुनावी प्रचारप्रसारका क्रममा सुनसरीको दुहवीमा डिजे बजाएको विषयलाई लिएर नेपाली कांग्रेस र नेकपा (एमाले) का कार्यकर्ताबीच झडप भएको छ ।

शुक्रबार चुनावी प्रचार प्रसारका क्रममा ठूलो आवाजमा डिजे बजाएको विषयलाई लिएर विवाद हुँदा झडप भएको हो । दुहवी–९ मा कांग्रेसबाट वडाध्यक्षका उम्मेदवार मेहदी हुसेनको घर नजिकै एमाले उम्मेदवार ताबिज हुसेनको टोलीले ठूलो आवाजमा डिजे बजाएको भन्दै विवाद हुँदा झडप भएको बताइएको छ ।

विवादपछि आक्रोशित काँग्रेस कार्यकर्ताको भिडले एमाले उम्मेदवारले चुनावी प्रचारका लागि साउन्ड सिस्टम राखेको गाडी तोडफोड गरेका छन् । गाडी तोडफोड भएपछि झडप भएको हो ।

जिल्ला प्रहरी कार्यालय सुनसरीका प्रवक्ता प्रहरी नायव उपरिक्षक नरेन्द्र कार्कीले एमाले र कांग्रेस कार्यकर्ताबीच सामान्य झडप बताए । ‘सामान्य विवाद भएको हो । त्यस्तो ठूलो कुनै झडप भएको होइन ।’ उनले फरकधारसँग भने,‘अहिले अवस्था सामान्य छ ।’