बीरगन्ज । जनता समाजवादी पार्टीमा आवद्ध महिला नेतृहरुले निर्वाचन केन्द्रित गतिविधीलाई निरन्तरता दिएका छन् । बीरगन्ज महानगरपालिकाका ३२ वटै वडा र विभिन्न टोलहरुमा घरदैलो थालेको महिलाहरुको समूहले जनतासँगको भेटघाटलाई तिव्रता दिएको हो ।

महिलाका समस्या तथा गुनासोहरु महिलाले नै बुझ्ने हुँदा महिलाहरुका समस्याहरु सुन्न घरदैलो अभियान थालिएको जसपा निकट समाजवादी महिला संघ मधेश प्रदेशकी उपाध्यक्ष पिंकी यादवले बताइन् । जसपाले चुनावी गतिविधलाई बढावा दिएसँगै जसपानिकट विभिन्न जनवर्गिय संगठनहरु पनि सक्रिय भएको महिला नेतृ अन्नपुर्ण मानन्धरको भनाई छ ।

यही बैशाख ३० गते हुने स्थानीय तहको निर्वाचनमा जसपालाई नै जिताउन घरदैलोका क्रममा उनीहरुले आग्रह गरीरहेका छन । जसपाले नै मधेशी समुदायका महिलाहरुलाई अधिकारको प्रत्याभुती दिलाउने र महिलालाई आत्मनिर्भर बनाएर आयआर्जनका स्रोतको सृजना गर्ने उनीहरुको भनाई छ ।

बीरगन्जका विभिन्न वडाहरुमा घरदैलो गर्ने क्रममा आइतवार बीरगन्ज महानगरपालिका वडा नम्बर २९ बसडिलवाका जनतासँग छलफल गरिएको छ । उनीहरुले गठबन्धनबाट मेयरका साझा उम्मेदवार राजेशमान सिँह र उपमेयरका उम्मेदवार इम्तियाज आलमलाई जिताउन आग्रह गरेका छन् ।

घरदैलोमा महिला नेतृ प्रेरणा श्रेष्ठ, रेखा सिँह, नितु श्रेष्ठ लगायतका नेतृहरु सहभागी छन् ।