वीरगंज । सन् २०१५ मा जेट एयरवेजको दोहा–कोच्ची उडानका क्रममा भएको घटना प्रस्तुत गरिएको फिल्म ‘रन वे ३४’ इमोशनल र हाई ओक्टेन थ्रिलर फिल्म हो । यसमा निर्माणसँगै निर्देशन समेत गरेका छन्, अजयले । उनले अन्तरवार्ताको क्रममा फिल्मको कथाले मन जितेकै कारण निर्देशन र निर्माण गरेको बताइसकेका छन् । फिल्ममा अजयसँगै अमिताभ बच्चन, राकुल प्रीत सिंह, क्यारीमिनाटी, बोमन ईरानीलगायतका कलाकारहरूको अभिनय रहेको छ । यो फिल्म प्रदर्शनरत छ । केही वर्ष यता इदमा सलमान खानको फिल्महरू प्रदर्शन भइरहेका छन्।
अघिल्लो वर्ष लकडाउनकै समयमा पनि सलमानले खुलेका केही थियटर र ओटीटीमा आफ्नो फिल्म ‘राधेु रिलिज गरेका थिए। सलमानको फिल्म इदमा आउने गरेकोले अन्य निर्माताले सो डेट हेर्ने गर्दैनन् । यद्यपि यो वर्ष सलमानसँग रिलिज गर्न कुनै फिल्म थिएन । तर उनको ‘टाइगर ३’ रिलिज हुने चर्चा नभएको होइन ।
यसैकारण आफ्नो फिल्म ‘रन वे ३४’ रिलिज गर्ने तयारी थालेपछि अजयले सलमानसँग संवाद गरेका थिए । सलमानले आफ्नो फिल्म नआउने पक्का गरेपछि मात्र अजयले इदको डेटमा फिल्म आउने घोषणा गरेका हुन् ।’सलमानले आफ्नो फिल्म नआउने भएपछि अजयलाई फिल्म हाल्न सल्लाह दिएका थिए । सलमानसँग फिल्म रिलिजको विषयमा संवाद गरेपछि उनी खुशी समेत भएका थिए । त्यसैले सलमानले फिल्मको टिजर र केही प्रचार सामग्री सामाजिक सञ्जालमा शेयर समेत गरेका छन्’ अजयका एक नजिकका साथीले बताए ।
फिल्म प्रमोसनको क्रममा अजयले फिल्मको सब्जेक्टले तानेकोले निर्देशन गरेको बताएका छन् । ‘मैले यो स्क्रिप्ट तीन वर्ष अगाडि नै सुनेको थिए । त्यो समयमा परिवर्तन गरेर ल्याउ भनेर पठाएँ । कोरोना भाइरसको कारण भएको लकडाउनमा मलाई यो स्क्रिप्टको याद आयो । र, मैले बोलाएर पढेँ’ अजयले भने ।
उनले भने अनुसार नै स्क्रिप्टमा परिवर्तन पाएपछि एक महिनामै फिल्म छाँयाकंनमा लगे । अजयले आफूले पहिले स्क्रिप्टमा निर्देशकको रूपमा जोडिएको बताए ।
