काठमाडौं- फ्रान्सेली राष्ट्रपति इम्यानुएल म्याक्रोंमाथि गोलभेँडा प्रहार भएको छ । राष्ट्रपति पदमा आइतबार पुनः निर्वाचित भएपछि सार्वजनिक कार्यक्रममा देखिएका म्याक्रोंमाथि गोलभेँडा प्रहार भएको बेलायती अखबार डेली मेलको अनलाइन संस्करणले जनाएको छ ।

राष्ट्रपति चुनावमा आफ्नो विजयपछि म्याक्रोंले फ्रान्सेली जनतालाई धन्यवाद दिन पेरिस नजिकैको सेर्जी नगरको भ्रमण गर्ने बेला भीडबाट कसैले उनलाई गोलभेँडाको झोलाले प्रहार गरेको थियो ।

तर, राष्ट्रपतिलाई गोलभेँडाले लागेन । म्याक्रोंलाई प्रहार गरेको गोलभेँडा उनलाई नलागी उनका सुरक्षाकर्मीलाई लागेको थियो । गोलेँभडाले लागेपछि ती सुरक्षाकर्मी अत्तालिएर चिच्याएका थिए ।
तत्काल सुरक्षा अधिकारीहरूले म्याक्रोंलाई चारै दिशाबाट घेरेका थिए । उनीहरूमध्ये एक जनाले एउटा विशेष छाता खोलेर म्याक्रोंलाई ढाकेका थिए ।