नेकपा एकीकृत समाजवादी पार्टीले एमाले नसुध्रिने भएपछि आफूहरुले विद्रोह गरेर नयाँ पार्टी गठबन्धन गरेको बताएका छन् । मंगलबार स्थानीय तह निर्वाचनको घोषणापत्र सार्वजनिक गर्दै एकीकृत समाजवादी पार्टीले २००६ साल वैशाख १० गते पुष्पलालका नेतृत्वमा गठन भएको नेपाल कम्युनिस्ट पार्टीका सच्चा उत्तराधिकारी आफू भएको जिकिर गरेको हो ।

यस्तै तत्कालीन नेकपा (एमाले) र मार्क्सवादीबीच एकीकरण भई बनेको एमालेका उत्तराधिकारी पनि एकीकृत समाजवादी नै भएको अध्यक्ष माधव कुमार नेपालले बताए । ‘हामी २००६ साल वैशाख १० गते कमरेड पुष्पलालका नेतृत्वमा गठन भएको नेपाल कम्युनिस्ट पार्टीका सच्चा उत्तराधिकारी हौँ । हामी नै कम्युनिस्ट आन्दोलनको एकता अभियानका सच्चा अभियन्ता हौँ । हामी तत्कालीन नेकपा (माले) र मार्क्सवादीबीच एकीकरण भई बनेको नेकपा (एमाले) का उत्तराधिकारी हौँ’ घोषणापत्रमा भनिएको छ, ‘कमरेड पुष्पलालको समयदेखि नै हामी नेपाली कम्युनिस्टहरू बलियो, स्वच्छ, जवाफदेही, जनसेवी र पारदर्शी स्थानीय सरकार निर्माण गर्ने पक्षमा अविचलित रूपमा सङ्घर्षशील रहिआएका छौं । कम्युनिस्ट आन्दोलनका धरोहर कमरेड पुष्पलाल, कमरेड मनमोहन अधिकारी र जननेता कमरेड मदन भण्डारीलगायत आदरणीय अमर सहिद एवं आन्दोलनमा योगदान पुयाउनुहुने अग्रजहरूलाई यस अवसरमा स्मरण गर्दै उच्च सम्मान गर्न चाहन्छौं ।’

घोषणापत्रमा समाजवादीले तीनै नेताको फोटो समेत प्रयोग गरेको छ। आफूलाई एमालेको उत्तराधिकारीको रुपमा प्रस्तुत गर्दै एकीकृत समाजवादीले विगतमा पार्टीले गरेका बृद्धभत्तालगायतका कार्यक्रमलाई समेत घोषणापत्रमा समेटेको छ।