काठमाडौं । कोभिड–१९ को महामारी सुरु हुनुअघि नेपालमा अभ्यास नभएको पीसीआर परीक्षण अहिले देशभरका १०५ वटा प्रयोगशालाबाट भइरहेको छ । ५९ सरकारी र ४६ निजी गरी सो संख्यामा पीसीआर परीक्षण प्रयोगशाला सञ्चालन भइरहेका छन् ।
कोभिड–१९ संक्रमणका तीनवटा लहर मापदण्ड नपुगेका सरकारी प्रयोगशालालाई समेत नियमनमा ल्याउने अवसर बनेको बताउँछिन् राष्ट्रिय जनस्वास्थ्य प्रयोगशाला (एनपीएचएल) निर्देशक डा. रुणा झा ।

“हामीले महामारीकै समयमा धेरै प्रयोागशालाहरुमा पुगेर मापदण्डअनुसार सञ्चालन भए नभएको अनुगमन गर्यौं र नपुगेकाहरुलाई मापदण्डअनुसार चल्न बाध्यात्मक व्यवस्था लागु गर्यौं । यो कोरोनाकालको एउटा ठूलो उपलब्धी हो,” एनपीएचएलमा भएको देशभरका पीसीआर परीक्षण ल्याबहरुको पोष्टर प्रदर्शनी कार्यक्रममा डा. झा ले भनिन्, “एनपीएचएलले नियमन र अनुगमनमा मात्रै कडाई गर्न खोजेको होइन अभिभावकको पनि भूमिका निर्वाह गर्छ ।

कार्यक्रममा स्वास्थ्य तथा जनसंख्या राज्यमन्त्री भवानीप्रसाद खापुङले प्रयोगशालाको संख्या र गुणस्तर अहिलेको अवस्थामा पुग्नु नेपालजस्तो मुलुकका लागि ठूलो उपलब्धी भएको भन्दै प्रयोगशाला र अनुसन्धानको क्षेत्रमा लगानी बढाउन सरकारको प्रयास रहने बताए ।
कार्यक्रममा कोभिड–१९ को पीसीआर परीक्षण गर्ने १०५ वटा प्रयोगशालाहरुले गरेको परीक्षण, चुनौती तथा अनुभवहरु समेटिएका पोष्टर प्रदर्शनीमा राखिएको छ ।