वागमती प्रदेशको एकमात्र उपमहानगर हेटौंडाका लागि लामो कसरतपछि नेकपा एमालेले मेयरका लागि वर्तमान मेयर हरिबहादुर महत, संविधानसभा सदस्य अनन्तप्रसाद पौडेल र गणेशकुमारी श्रेष्ठलाई सिफारिस गर्ने निर्णय गरेको छ ।
२०७४ को स्थानीय निर्वाचनमा हेटौंडाको मेयर र उपमेयर दुवैमा एमालेका उम्मेदवार विजयी हुनुभएको थियो । मंगलबार भएको बैठकमा सर्वसम्मतरूपमा मेयरका उम्मेदवार चयन गर्न नसकेपछि उपमहानगर कमिटीले ३ जनाको नाम जिल्ला कमिटीमा सिफारिस गर्ने निर्णय गरेको हो । उपमेयरमा सुमित्रा काफ्ले, आरती पाठक र इन्द्रप्रसाद नेपालको नाम सिफारिस गर्ने निर्णय भएको छ ।
आइतबार बसेको बैठकमा ९ जनाले मेयरमा दाबी गरे पनि ६ जनाले सहमतिका आधारमा ३ जनाको नाम सिफारिस गर्न तयार हुनुभएको थियो । उपमेयरमा पनि ७ जनाले दाबी गर्नुभएको थियो । जिल्ला कमिटीमा सिफारिस भएका उम्मेदवारबीच पुनः छलफल गराएर सकेसम्म १-१ जनाको नाम प्रदेश कमिटी हुँदै केन्द्रीय कमिटीमा पठाइने बताइएको छ ।
आसन्न स्थानीय तह निर्वाचनका लागि नेकपा एमालेबाट मनहरी गाउँपालिका अध्यक्षमा ५ जनाको नाम सिफारिस भएको छ । एमाले मनहरी गाउँपालिका कमिटीको बैठकले अध्यक्षका लागि ५ जनाको नाम सिफारिस गरेको हो ।अध्यक्षका लागि एकराज उप्रेती, श्यामसुन्दर ढकाल, जयराम अर्याल, नवीन सुबेदी र दिलबहादुर स्यांतानको नाम सिफारिस गरिएको हो । उपाध्यक्षमा सुजिता थिङ, पम्फा रोक्का, विमला कार्की र गीता प्रजाको नाम सिफारिस गरिएको हो । केही दिन अघिदेखि जारी बैठकले सर्वसम्मत नाम चयन गर्न नसकेपछि अध्यक्षमा ५ जना र उपाध्यक्षमा ४ जनाको नाम सिफारिस गरेको हो ।
मकवानपुरको पूर्वीक्षेत्रमा रहेको सबभन्दा ठूलो गाउँपालिका बकैयामा अध्यक्षमा ५ जनाले दाबी गर्नुभएको छ । गाउँ कमिटी बैठकले अध्यक्षमा पद्मा पौडेल, सरला बोलखे, दलबहादुर वाइबा, कृष्णप्रसाद चौलागाईं तथा गोपाल दाहालको नाम जिल्ला कमिटीसमक्ष सिफारिस गरेको छ ।बैठकले उपाध्यक्षमा बद्रीलाल थिङ, विजय वाइबा, लालबहादुर स्यांतान, सुस्मिता घोरासैनी, जिमी लोस्यांतान, यांग्रीडोल्मा लामाभोम्जनलाई सिफारिस गरेको छ । दुई दिनसम्म चलेको बैठकले अध्यक्ष र उपाध्यक्षमा एक-एक जना सर्वसम्मत गर्न नसकेपछि अध्यक्षमा ५ तथा उपाध्यक्षमा ६ जनाको नाम सिफारिस गरेको हो ।
स्थानीय निर्वाचनमा एमालेले मकवानपुरगढी गाउँपालिका अध्यक्षमा वर्तमान अध्यक्ष विदुर हुमागार्इंलाई नै उठाउने भएको छ । गाउँपालिका कमिटीको बैठकले स्थानीय तह निर्वाचनमा गाउँपालिका अध्यक्षमा हुमागाईलाई सर्वसम्मत सिफारिस गर्ने निर्णय गरेको छ । बैठकले गाउँपालिका उपाध्यक्षमा सन्तु थिङलाई उम्मेदवार बनाउने निर्णय गरेको छ । २०७४ को स्थानीय निर्वाचनमा गाउँपालिका अध्यक्ष तथा उपाध्यक्ष दुवैमा एमालेका उम्मेदवार विजयी हुनुभएको थियो ।
स्थानीय तहको निर्वाचन मिति नजिकिएसँगै मकवानपुरमा पनि राजनीतिक दलहरु प्रचारप्रसारमा व्यस्त हुन थालेका छन् । गाउँमा भेला, पार्टी प्रवेश तथा छलफलका कार्यक्रमले तीव्रता पाएका छन् । मकवानपुरमा यसपालि पाँच दलीय गठबन्धन र नेकपा एमालेबीच टक्कर हुने निश्चितजस्तै छ । गठबन्धनले नेपाली कांग्रेसको अगुवाईमा एमालेसँग भिड्ने यसअघि नै निर्णय गरिसकेको छ ।जिल्लाका १ सय २ वडामध्ये कुनैमा पनि गठबन्धनमा रहेका दलहरुले उम्मेदवार सिफारिससम्म गर्न सकेका छैनन् । तालमेल गरेर चुनाव लड्ने निर्णय गरे पनि गठबन्धनमा भागवण्डा पनि मिलिसकेको छैन ।
चर्को असन्तुष्टिबीच उम्मेदवार छनोट गर्न गठबन्धनलाई ठूलो चुनौती छ । मकवानपुर गठबन्धन समितिका अध्यक्षको जिम्मेवारी पाउनुभएका कांग्रेस मकवानपुर सभापति बुद्ध लामाले स्थानीय तहका उम्मेदवार अनि गठबन्धनसँग बारम्बार छलफल भइरहेको बताउनुभएको छ । गठबन्धन भएपछि सबैको छलफल गर्न आवश्यक हुने भएकाले उम्मेदवार चयनमा ढिलाइ भइरहेको भन्दै उहाँले गठबन्धनको प्राविधिक कुरा अझै बाँकी रहेको बताउनुभयो ।
‘उम्मेदवार छनोट गर्ने आधार तथा विषय छनोट गर्नुपर्ने भएकाले गठबन्धनका सन्दर्भमा सबै दलको इच्छा, चाहना, भावना तथा उहाँहरुको सोचाइमा एकरूपता आउन सकिरहेको छैन । एकरूपता ल्याउन पनि केही दिन लाग्छ । छलफलबाट सहमति जुटेपछि आ–आफ्ना पार्टीले उम्मेदवार छनोट गर्नुहुनेछ । र, हामी हाम्रो उम्मेदवार टुंगो लगाउने छौं ।’ –उहाँले भन्नुभयो ।
