रौतहट — ईशनाथ नगरपालिका ७ मा रहेको बीपी कोइराला आदर्श माध्यमिक विद्यालयका प्रधानाध्यापकसहित दुईजनालाई अख्तियार दुरुपयोग अनुसन्धान आयोग टंगाल काठमाडौंको टोलीले बुधबार घुसको रकमसहित नियन्त्रणमा लिएको छ ।

अख्तियारले डेढ महिनाको अवधिमा यस जिल्लाबाट घुसको रकमसहित पक्राउ गरेको यो दोश्रो घटना हो । विद्यालयका प्रधानाध्यापक राकेश ठाकुर र उनका सहयोगी दीपेन्द्रकुमार झालाई अख्तियारको केन्द्रीय कार्यालयल टंगालबाट डीएसपी पुष्पमल्ल ठकुरी नेतृत्वको टोलीले सदरमुकाम गौर जोड्ने जिल्लाको सहायक मार्गको सरुअठा चोकबाट नियन्त्रणमा लिएको हो ।

ठाकुरले आफ्नै विद्यालयको उच्च माध्यमिक तहमा अध्यापन गर्ने दुई शिक्षकको समय अवधि (म्याद) थप गर्न जनही १ लाख पचास हजार रुपैयाँ लिएका थिए । त्यही बेला घुसको रकमसहित अख्तियारले नियन्त्रणमा लिएको हो । प्रधानाध्यापक ठाकुरले पैसा दिएपछि मात्र म्याद थप्ने माग अघि सारेपछि पीडित शिक्षकले अख्तियारलाई जानकारी गराएका थिए ।

अख्यितारका केन्द्रीय प्रवक्ता श्याम भण्डारीले ३ लाख घुसको रकमसहित दुबैजनालाई नियन्त्रणमा लिएको पुष्टि गरेका छन् । ‘अख्तियारको टोलीले करारको शिक्षकको म्याद थप्ने बाहानामा ३ लाख रकम माग गरेको र उक्त रकमसहित दुबैलाई नियन्त्रणमा लिइएको छ,’ उनले भने, ‘बाँकीको कुरा सोधपुछ र अनुसन्धानपछि खुल्छ ।’

टोलीले सामान्य सोधपुछपछि ठाकुर र सहयोगी झालाई आवश्यक कारबाहीका लागि अपराह्न काठमाडौं लगेको छ । प्रधानाध्यापक ठाकुरले शिक्षक नियुक्ति र म्याद थप्ने बाहनामा शिक्षकहरुबाट रकम लिने गरेको स्थानीयको गुनासो छ ।

एक महिनाअघि गोनाही नगरपालिकाका नगर प्रमुख धर्मेन्द्र पटेल, लेखापाल प्रदीप यादव, योजनाका कर्मचारी मुकेश पटेल र नगरप्रमुखका स्वकीय सचिव अशोक पटेललाई नियन्त्रणमा लिएर काठमाडौं लगेको थियो । उनीहरु धरौटी तारेखमा रिहा भइसकेका छन् । देबाही गोनाही १ करुनीयास्थित वडा कार्यालयको भवन निर्माणको काम सम्पन्न भएपछि अन्तिम भुक्तानी माग गर्दा नगरप्रमुख पटेलले उपभोक्ता समितिसित ५ लाख घुस लिएको अवस्थामा पक्राउ गरेको थियो । उक्त आरोप नगरप्रमुख पटेलले अस्वीकार गर्दै आएका थिए ।