सोलुखुम्बु | सगरमाथाको दोस्रो शिविरसम्मको बाटो खुलेको छ। विश्वको सर्वोच्च शिखर आरोहणको बाटो निर्माणको जिम्मा पाएको आइसफल डक्टरको टोलीले आधारशिविरदेखि शिविर दुईसम्मको बाटो निर्माण गरेको हो।सगरमाथा प्रदूषण नियन्त्रण समिति (एसपिसिसी)का अनुसार ६ जना आइसफल डाक्टर अर्थात् हिउँमा बाटो बनाउने अनुभवी व्यक्तिहरूले बाटोमा सङ्केत राख्ने, भर्याङ राख्ने, डोरी टाँग्नेलगायत काम गरेका छन्।
दोस्रो शिविरसम्मको बाटो खुलेसँगै आरोहीहरूलाई त्यहाँसम्म जान अनुमति दिइएको एसपिसिसीका उपाध्यक्ष लामाकाजी शेर्पाले बताए। एसपिसिसीले अनुमति दिएपछि मात्रै आरोही र पथ प्रदर्शक दोस्रो शिविरसम्म जान पाउँछन्। आरोहणका लागि शरीरलाई अनुकूल बनाउन आरोही आधार शिविरबाट दोस्रो शिविरसम्म जाने र फर्कने गर्ने भएकाले दोस्रो शिविरमा चाँडै क्याम्प तयार पारिन्छ।
यसपटक आधारशिविरदेखि दोस्रो शिविरसम्म १५ वटा भर्याङ प्रयोग गरिएको उपाध्यक्ष शेर्पाले जानकारी दिए। सन् २०१८ मा ३२ वटा भर्याङ प्रयोग भएकोमा सन् २०१९ मा २० वटा मात्रै प्रयोग भएको थियो।
सगरमाथाको आधार शिविर हुँदै दोस्रो शिविरसम्मको बाटो प्रयोग गरेर सगरमाथासहित ल्होत्से र नुप्त्से हिमालको पनि आरोहण गरिन्छ। आधार शिविरमा हरेक समूहले आरोहण शुरु गर्नुअघि बौद्ध परम्पराअनुसार पूजापाठ गर्ने, पूजापाठ गर्दा हिमालमा कुल्चनुअघि क्षमापूजा र शक्ति माग्ने प्रचलन रहेको छ।
खुम्बुमा पर्यटकको चहलपहलमा वृद्धि
पर्यटकीय याम शुरु भएसँगै खुम्बुमा पर्यटक आउने क्रम बढेको छ। वसन्त ऋतु शुरु हुन लागेसँगै खुम्बु क्षेत्र भित्रिने पर्यटकको सङ्ख्यामा वृद्धि हुँदै गएको हो।खुम्बु क्षेत्रमा पछिल्लो एक सातामा ९ सयभन्दा बढी पर्यटक भित्रिएको खुम्बु पासाङ ल्हामु गाउँपालिकाले जनाएको छ। अहिले लुक्लास्थित तेन्जिङ हिलारी विमानस्थलमा समेत चहलपहल बढेको नागरिक उड्डयन प्राधिकरण लुक्लाका कर्मचारी खुमप्रसाद पौडेलले बताए।
लुक्लामा दैनिक ४५ वटासम्म हेलिकप्टर र ३५ वटासम्म जहाजले उडान भर्ने गरेका छन्। एकै दिनमा १४ वटा जहाजमार्फत २ सय ६६ जना र ४५ वटा हेलिकप्टरमार्फत २ सय २५ जनासम्म पर्यटक खुम्बु भित्रिने गरेको उनको भनाई छ। अहिले भित्रिने यात्रुको चाप बढी र फर्कने यात्रु शून्यजस्तै हुने गरेको विमानस्थल कार्यालयले जनाएको छ।
