उच्च अदालत पाटनले अन्तरिम आदेशलाई निरन्तरता नदिएपछि भन्सार एजेन्टको परीक्षा अघि बढेको छ।
भन्सार विभागका अनुसार रोकिएको परीक्षा आगामी वैशाख १७ गते हुने भएको हो।
फागुन २६ गते उच्च अदालत पाटनले तत्काल परीक्षा सञ्चालन नगर्न अन्तरिम आदेश दिएको थियो।
त्यसपछि तोकिएको परीक्षा नै स्थगन भएको थियो। पछि चैत १३ गते उच्च अदालत पाटनले उक्त अल्पकालीन अन्तरिम आदेशलाई निरन्तरता नदिएपछि परीक्षा सञ्चालन अघि बढेको हो।
आज भन्सार विभागले सूचना जारी गर्दै वैशाख १ गते शनिबार २ बजेलाई मिति तय गरेको छ। परीक्षा केन्द्र केही दिनमा जारी गरिनेछ।
भन्सार एजेन्टको लाइसेन्स २१ वर्षदेखि वितरण हुन सकिरहेको छैन। २१ वर्षअघि सरकारले लाइसेन्स दिएको थियो। त्यसपछि हालसम्म नयाँ लाइसेन्स वितरण हुनसकेको छैन।
२०५७ सालमा नयाँ थपिँदा ५ सय रहेका एजेन्टहरु अहिले १ सय ७० जना मात्रै रहेको भन्सार एजेन्ट महासंघले जनाएको छ।
केहीले पेशा परिवर्तन गर्दा र केहीको मृत्यु समेत हुँदा अहिले त्यो संख्या निकै घटेको महासंघको भनाइ छ।
अहिले देशभर ३९ वटा भन्सार कार्यालयहरु छन्। यी कार्यालयहरुमा धान्ने अहिले १ सय ७० जना मात्रै भन्सार एजेन्टहरु छन्।
यसलाई परिपूर्ति गर्न गत आर्थिक वर्षदेखि सरकार लागिपरेको छ। तर विभिन्न अवरोधको कारणले गर्दा रोकावट आइरहेको हो।
६ सय ४० जना नयाँ थप गर्ने सरकोको योजना छ।
