वीरगन्ज | यातायात व्यवस्था विभागले सवारीचालक अनुमतिपत्र (लाइसेन्स)का लागि आवेदन दिएको १५ दिनभित्र ट्रायल र लिखित परीक्षा दिलाउने तयारी गरेको छ ।

विभागले एक महिनाका लागि नयाँ आवेदन बन्द गरेर यस्तो व्यवस्था ल्याउने तयारी गरेको हो । अबको केही महिनामै यस्तो व्यवस्था ल्याउन लागेको विभागका महानिर्देशक नमराज घिमिरेले जानकारी दिए ।

नयाँ आवेदकले आवेदन दिएको १५ दिनभित्र पालो आउने व्यवस्था ल्याउन लागिएको उनले बताए । ‘‘आवेदन दिएको १५ दिनभित्र ट्रायल परीक्षाको पालो आउनेछ । आवेदकले आवेदन दिएको एक सातामा कर्न्फम डेट पाउँछ । त्यसपछि परीक्षाको पालो एक सातापछि आउँछ,” उनले भने, “त्यसपछि देशैभरका यातायात कार्यालयमा कहाँ कति सिट खाली छ भन्ने कुरा विभागको सिस्टमले देखाउनेछ ।”

एउटा यातायात कार्यालयमा आवेदन ‘प्याक’ भए आवेदकले अर्को कार्यालयमा आवेदन दिएर १५ दिनभित्र परीक्षा दिन पाउने उनले जानकारी दिए । ‘‘देशैभरिका कार्यालयबाट सिस्टममा परीक्षा सञ्चालन गरिनेछ । यसरी परीक्षा सञ्चालन गर्दा सबै कार्यालयमा प्याक भएको खण्डमा कार्यालयले आवेदन लिने छैनन् । आवेदकले त्यसको पछिल्लो दिन पुनः आवेदन दिनुपर्नेछ,” महानिर्देशक घिमिरेले बाह्रखरीसित भने ।

विभागले अबको केही महिनादेखि लागु गरिने यस व्यवस्थालाई एक प्रकारको कोटा सिस्टम भनेर प्रष्ट पारेको छ । पुराना सेवाग्राहीलाई स्मार्ट लाइसेन्स उपलब्ध गराएर मात्रै यो व्यवस्था लागु गरिने विभागले जनाएको छ ।

यसअघि, आवेदन दिएको आठ महिना/वर्ष दिनमा मात्रै ट्रायल र लिखित परीक्षाको पालो आउथ्यो । ‘‘हाल पुराना सेवाग्राहीको चाप घटाउने काम भइरहेको छ । यसअघि सेवाग्राहीलाई समयमै लाइसेन्स उपलब्ध नगराएकै कारण एक महिनाका लागि नयाँ आवेदन बन्द गराएका हौँ,” उनले भने, “केही महिनामा पुराना सेवाग्राहीलाई लाइसेन्स उपलब्ध गराइसक्छौँ । त्यसपछि नयाँ व्यवस्थाअनुसार १५ दिनमै परीक्षा लिन्छौँ ।”

वाग्मतीबाहेकका प्रदेशमा परीक्षाको नयाँ नियम लागु
वाग्मती प्रदेशबाहेक अरू प्रदेशमा विभागले ल्याएको परीक्षाको नयाँ प्रावधान कार्यान्वयनमा आइसकेको छ । त्यसानुसार लिखित परीक्षामा ८० र ट्रायल परीक्षामा ७० अंक ल्याए उत्तीर्ण हुने व्यवस्था छ । वाग्मतीमा पनि केही महिनाभित्रै यो प्रावधान लागु गरिने महानिर्देशक घिमिरेले जानकारी दिए ।

दुई लाख ५० हजार पुराना लाइसेन्स छाप्न बाँकी
केही महिनाअघि खरिद गरेका १४ लाख स्मार्टकार्ड अहिले प्रिन्ट भइरहेको विभागले जनाएको छ । महानिर्देशक घिमिरे भन्छन्, ‘‘हामीले स्मार्ट लाइसेन्स प्रिन्ट गरेर देशभरका यातायात कार्यालयमा पठाइरहेका छौँ । करिब दुई लाख ५० हजार आवेदकको स्मार्ट लाइसेन्स छाप्न बाँकी छ । अब वैशाख १५ गतेभित्र सबै पुराना सेवाग्राहीलाई स्मार्टलाइसेन्स वितरण गर्नेछौँ ।”

नयाँ आवेदन खुलेसँगै सेवाग्राहीले लिखित परीक्षा उत्तीर्ण भएको केही दिनमै परीक्षणकालीन लाइसेन्स पाउने उनले बताए । नवीकरणका लागि राजस्व तिरेको १५ दिनभित्र स्मार्ट लाइसेन्स उपलब्ध गराइने उनको भनाइ छ ।

कहिले खुल्छ नयाँ आवेदन ?
विभागले हाल बन्द रहेको आवेदन खुलाउन एक महिना लाग्ने जानकारी दिएको छ । छिटोमा वैशाख १५–२० गते र ढिलोमा वैशाख मसान्तसम्म आवेदन खोलिने घिमिरे बताउँछन् ।

‘‘पुरानो प्रिन्टिङ वैशाख १५ भित्र वितरण गर्न सक्यौँ भने त्यसपछि रेगुलर लाइसेन्स उललब्ध गराउन सकिनेछ,” घिमिरेले भने ।