वीरगन्ज | शिक्षा, विज्ञान तथा प्रविधि मन्त्रालयकी राज्यमन्त्री बोधमाया कुमारी यादवले नेपाली शिक्षित जनशक्ति विदेशिने क्रम बढेको तथा स्वदेश फर्किने क्रम न्यून रहेकोमा चिन्ता व्यक्त गरेकी छन् । ‘विदेश जानेको संख्या बढ्दो छ । तर , हामीले उहाँहरुलाई स्वदेश फर्काउन सकिरहेका छैनौँ’ राज्यमन्त्री यादवले भनिन् । उनले नयाँवानेश्वरस्थित एस पिपुल एजुकेसन एण्ड भिसा सर्भिसेसको उद्घाटन गर्दै स्वदेशमा दक्ष जनशक्ति फिर्ता ल्याउन जुट्नु पर्ने बताइन् ।
‘विदेशमा अध्ययन गर्न जानु राम्रो हो । हामी त्यहाँ लिने शिक्षा र सिक्ने सीपलाई स्वदेशमा उपयोग गर्न सके मात्र यहाँ विकासको नयाँ सम्भावना देखिन्छन्’ राज्यमन्त्री यादवले भनिन् । उनले पछिल्लो समय सरकारले हरेक नगरपालिकामा रहेका दुई शैक्षिक संस्थामा प्राविधिक शिक्षाको व्यवस्था गरेको जनाउँदै केहि नगरपालिकामा पढाउने शिक्षक समेत नपाएको बताइन्।
‘विदेश पढ्न जाँदा धेरै ध्यान पुर्याएर जानुपर्छ । विदेश पुगेर ठगिएका विद्यार्थीहरुको गुनासो आउने गरेका छन् । यहाँ (एस पिपुल एजुकेसन) बाट जानेलाई राम्रो गाइड गर्नु होला । शिक्षित भएपछि नेपाल फर्किन प्रेरित गर्नु होला’ राज्यमन्त्री यादवले भनिन् । एस पिपुल एजुकेसन एण्ड भिसा सर्भिसेसका सीईओ रोशन भट्टराईले विद्यार्थीलाई सही सुझाव दिने बताए ।
‘हामीले सिड्नीमा सेवा दिइरहेका छौँ । अब नेपालबाट पनि गाइड गर्ने छौँ। हाम्रो दायित्व विद्यार्थीलाई त्यहाँ पठाएर मात्र सकिंदैन। सिड्नीमा विद्यार्थीलाई चाहिँदा हामी सेवामा हाजिर हुन्छौँ’ सीईओ भट्टराईले भने । उनले आफूहरुले उच्च शिक्षाका लागि अष्ट्रेलिया मात्र पठाउने गरेको बताए । नेपाल शाखा सुभारम्भ समारोहमा शिक्षा पत्रकार समाजका अध्यक्ष प्रकाश सिलवाल , गायक उदेश श्रेष्ठ , रंग पत्रकार राजन घिमिरे लगायतको उपस्थिति रहेको थियो ।
