बीरगंज । रुसले युक्रेनमा आक्रमण गरेको एक महिना बितिसकेको छ ।एक महिना लगातार रुसको आक्रमण जारी रहदा पनि युक्रेन हार भने मानेको छैन र रुस पनि पछि हट्न तयार देखिएको छैन । यो युद्धको कसरी हुन्छ भन्ने अनेकौं विश्लेषण भैरहेका छन् । युक्रेनले लगातार अन्तर्राष्ट्रिय समुदायमा रुसलाई कमजोर बनाउन अपिल गरिरहेको छ । युक्रेनी राष्ट्रपति भोलोडिमिर जेलेन्स्कीले अमेरिका र युरोपका नेताहरुमाथि रुसमाथि थप कडाई गर्न र दबाब बढाउन लगातार आग्रह गरिरहेका छन् । यसैबीच नेटोले ब्रसेल्समा युक्रेन

संकटलाई लिएर आपतकालीन बैठक गर्यो । यस बैठकमा अमेरिकी राष्ट्रपति जो बाइडेनसहित नेटो देशका शिर्ष नेताहरुले सहभागिता जनाएका छन् । यस बैठकलाई सम्बोधन गर्दै बाइडेनले रुसी राष्ट्रपति भ्लादिमिर पुटिनले युक्रेनविरुद्ध रासायनिक हतियार प्रयोग गरेमा नेटोले जवाफ दिने चेतावनी दिए ।

यसैबीच, युक्रेनी राष्ट्रपति भोलोडिमिर जेलेन्स्कीले हतियारको अभावको सामना गरिरहेको बताएका छन् । उनले युक्रेनलाई १,००० मिसाइल चाहिने बताएका छन् । युक्रेनले अमेरिकालाई रुसी सेनासँग लड्न दिनमा ५०० भाला र ५०० स्टिङगर आवश्यक पर्ने बताएको थियो ।

युक्रेनले विगत केही दिनदेखि अमेरिकी सरकारसँग थप सैन्य सहायता लिनको लागि आफ्नो सूची अद्यावधिक गरिरहेको छ । पहिले अनुरोध गरिएको सैन्य सहायता भन्दा धेरै एन्टि-एयरक्राफ्ट र एन्टी-ट्याङ्क मिसाइलहरू माग गरिएको छ । यस सूचीमा जेट, आक्रमण हेलिकप्टर र एस-३०० जस्ता एन्टि-एयरक्राफ्ट प्रणालीहरू पनि छन् ।

युक्रेनले यो सूची गत हप्ता अमेरिकालाई दिएको थियो । हालै यो सूची अमेरिकी सांसदहरूलाई हस्तान्तरण गरिएको छ । यस सूचीमा युक्रेनले अमेरिकी निर्मित स्टिङ्गर एन्टी-एयरक्राफ्ट मिसाइल र जेभलिन एन्टी-ट्याङ्क मिसाइलहरूको बढ्दो आवश्यकतालाई जोड दिएको छ । युक्रेनले यसलाई तुरुन्तै यी हतियार र उपकरणहरूको आवश्यकता रहेको बताएको छ ।

अमेरिकी कंग्रेसका केही सांसदहरूले अमेरिकाले युक्रेनलाई उनीहरूले मागेका हतियारहरू तुरुन्तै उपलब्ध गराउनुपर्छ भन्ने विश्वास गर्छन् । नेभाडाका डेमोक्र्याट सेन ज्याकी रोजेनले गत साता पोल्याण्ड र जर्मनीको भ्रमण गरे र ती देशहरूमा आएका युक्रेनी शरणार्थीहरूलाई मानवीय सहायता प्रदान गर्ने नागरिक समाजका संस्थाहरूसँग भेट गरेका छन् । ‘उनीहरूलाई युद्धमा बाँच्नको लागि मात्र नभई युद्ध जित्नका लागि सबै हतियार र उपकरणहरू चाहिन्छ, त्यसैले हामी उनीहरूलाई हावाबाट जमिनमा मार हान्ने मिसाइलहरू, ड्रोनहरू र सबै लजिस्टिक सपोर्ट प्रदान गर्छौं ।’ रोजेनले सीएनएनसंगको कुराकानीमा भनेका छन् ।

अमेरिका र अन्य नाटो सदस्य देशहरूले युक्रेनमा लगभग १७ हजार एन्टि-ट्याङ्क मिसाइल र २००० एन्टि-एयरक्राफ्ट मिसाइलहरू पठाइसकेका छन् । युक्रेनले यहाँबाट निरन्तर सैन्य सहायता पाइरहेको छ । अमेरिकाले सुरक्षा सहायतामा ३५० मिलियन डलर फेब्रुअरीको अन्त्यमा युक्रेनलाई दिइसकेको छ । योसँगै अर्को दुई प्याकेज गरि अहिलेसम्म कुल सहयोग एक अर्ब डलर पुग्न थालेको अमेरिकी मिडियाहरुले उल्लेख गरेका छन् ।

त्यस्तै बेलायतले युक्रेनलाई ट्याङ्क विरोधी र उच्च विस्फोटक हतियारसहित थप ६ हजार मिसाइल पठाउने घोषणा गरेको छ । त्यस्तै बेलायतले युक्रेनी सेनालाई आर्थिक सहयोगका लागि करिब ३३ मिलियन डलर पनि दिने घोषणा गरेको छ ।