वीरगञ्ज। सडकमा अलपत्र परेका बेसाहारा सहयोगापेक्षी मानिसलाई गाँस, बास र कपाससँगै औषधि उपचारको व्यवस्था गर्दै आएको मानवसेवा आश्रम वीरगञ्जका लागि बन्ने भवनको आज शिलान्यास गरिएको छ । मधेश प्रदेशका मुख्यमन्त्री लालबाबु राउत गद्दी, सङ्घीय सांसद् प्रदीप यादव र वीरगञ्ज महानगरपालिकाका नगरप्रमुख विजयकुमार सरावगीले संयुक्त रुपमा निर्माण गर्न लागिएको भवनको शिलान्यास गरेका हुन् ।

महानगरपालिकाले उपलब्ध गराएको लगभग १८ कठ्ठा क्षेत्रफलमध्ये १४ कठ्ठामा भान्छा घर, तालिम हल, सहयोगापेक्षीलाई राख्ने कोठाहरु, हेरचाहमा खट्नेहरुका लागि आवास र आश्रममा आउने पाहुनाका लागि अतिथि गृहसहितको भवन निर्माण गरिने आश्रमका प्रदेश संयोजक देवेश गुप्ताले बताए । बाँकी रहेको जग्गामा घुमघाम गर्नका निमित्त पार्क र अन्य रचनात्मक गतिविधिका लागि खाली रहने छ । भवन निर्माणमा लगभग १८ करोड खर्च लाग्ने अनुमान गरिएको गुप्ताले जानकारी दिए । निर्मित भवनले भोजपुरी कला सँस्कृतिलाई झल्काउने, वातावरण सुहाउँदो र भूकम्प प्रतिरोधी हुने बताईएको छ ।

शिलान्यास पूर्व कार्यक्रममा बोल्दै मुख्यमन्त्री राउतले आश्रम निर्माणमा लाग्ने खर्चका लागि प्रदेश सरकारले भएसम्मको सहयोग गर्ने प्रतिबद्धता व्यक्त गरे । यसअघि आश्रमको भवन निर्माणका लागि प्रदेश सरकारको तर्फबाट ३० लाख रुपैयाँ छुट्ट्याएपनि जग्गाको आभवमा खर्च गर्न नपाएको बताए । ‘आश्रमको भवन निर्माणका लागि मधेश प्रदेश सरकारको तर्फबाट ३० लाख रुपैयाँ छुट्याएका थियौं । तर जमिन नभएकाले दिन सकेनौं,’ मुख्यमन्त्री राउतले भने, ‘तर अब भवन बन्न लागेको छ । निर्माण सञ्चालनलगायतमा प्रदेश सरकारले के कस्तो सहयोग गर्नुपर्छ त्यसका लागि तयार छौं ।’

पर्सा क्षेत्र नम्बर १ का प्रतिनिधिसभा सदस्य सांसद् प्रदीप यादवले आगामी बजेटमा मानवसेवा आश्रमको भवन निर्माणका लागि विशेष बजेट छुट्याउने जिकिर गरे । उनले मानवताको कामका लागि आफू सधै तयार रहने बताउँदै अन्य दातृ निकायबाट समेत समन्वय गरेर सहयोग उपलब्ध गराउने बताए ।

तिन वर्ष भित्र भवनको निर्माण सम्पन्न गर्ने लक्ष्य लिइएको छ । गर्मीमा शितल र जाडोमा न्यानो दिने प्रविधि रेम्ड अर्थ प्रविधिबाट भवन निर्माण गर्न लागिएको गुप्ताले बताए । आश्रमको भवन निर्माणका लागि महानगरपालिकाले ५० लाख रुपैयाँ सहयोग पनि उपलब्ध गराएको छ । जसमध्ये २५ लाख रुपैयाँबाट आश्रम अगाडीको रहेको जग्गालाई बाटो प्रायोजनका लागि खरिद गरिएको छ र बाँकी २५ लाखबाट माटो पूर्ण र अन्य प्रारम्भिक कामहरु भइरहेको छ ।

मानव सेवा आश्रमको १३ जिल्लामा आफ्नै भवन बनिसकेको छ । मानव सेवा आश्रमले वि.सं. २०८० भित्रमा आश्रम शाखाहरुको भवन बनाइसक्ने, वि.सं.२०८१ सम्म जनचेतना फैलाउने र वि.सं. २०८२ बैशाख १ गते औपचारिक रुपमा सडक मानवमुक्त नेपाल घोषणा गर्ने लक्ष्य लिएको छ ।

०७४ जेठ १५ गते स्थापना भएको मानव सेवा आश्रम वीरगञ्ज शाखामा ६ जना बालबालिका सहित ६२ जना आश्रित छन् ।