वीरगन्ज । मधेश प्रदेश सरकारले डेढ वर्षअघि खरिद गरेको बस नचलाउने निर्णय गरेको छ । डेढ वर्षदेखि अलपत्र पारेर राखेको बस अन्तत: मधेश सरकारले नचलाउने निर्णय गरेको हो ।

मंगलबार बसेको मन्त्रीपरिषद्को बैठकले प्रदेशका ८ वटै जिल्लाका वासीलाई सहज रुपले जोड्ने उद्देश्यले खरिद गरेको पाँचवटा नचलाएर विभिन्न संघ संस्थाहरुलाई चलाउनका लागि दिने निर्णय गरेको प्रदेश सरकारका प्रवक्ता एवम् अर्थमन्त्री शैलेन्द्र प्रसाद साहले जानकारी दिएका छन् ।

बैठकले मधेश स्वास्थ्य विज्ञान प्रतिष्ठानलाई २ वटा, कृषि विश्वविद्यालय, कृषि तालिम केन्द्र धनुषा र प्रदेश प्रशिक्षण केन्द्रलाई १/१ वटा बस दिने निर्णय गरेको साहले बताए ।

मधेश सरकारका तत्कालिन भौतिक पूर्वाधार विकासमन्त्री जितेन्द्र सोनलले प्रदेश परिवहन स्थापना सोचका साथ २०७७ सालको धनतेरसका दिन भ्याट सहित ३ करोड ३९ लाख ९० हजार रुपैयाँमा बस खरिद गरेका थिए । तर मुख्यमन्त्री लालबाबु राउतले आफ्नो सत्ता जोगाउन मन्त्री सोनलको मन्त्रालय खोसेर नेपाली कांग्रेसलाई दिएपछि बस प्रयोगमा आउन सकेको थिएन् ।

प्रदेश सरकारका प्रवक्ता मन्त्री साहले बस सञ्चालन गर्दा खर्च निकै हुने, कर्मचारीहरुको व्यवस्था गर्नुपर्ने लागयत धेरै पूर्वाधारको विकास आवश्यक पर्ने भएकोले बसहरुलाई विभिन्न संघ संस्थाहरुलाई दिने निर्णय गरेको बताए ।

त्यस्तै मन्त्रीपरिषद्को बैठकले लहानमा रहेको यातायात व्यवस्था कार्यालयको सेवालाई विस्तार गरेर राजविराजमा समेत खोल्ने, युवा स्वरोजगार उद्योग कार्यक्रमको कार्यविधिलाई स्वीकृति प्रदान गरेको छ ।