जनकपुरधाम | गण्डकी प्रदेशका मुख्यमन्त्री कृष्णचन्द्र नेपाली पोखरेलले मधेश प्रदेश र गण्डकी प्रदेशबीच समृद्धिका लागि विभिन्न क्षेत्रमा सहकार्यको आवश्यकता रहेको औंल्याएका छन्।मुख्यमन्त्री पोखरेलले दुई प्रदेश सरकारबीचको सहकार्यबाट समृद्धि हुन सक्ने र समृद्धिका क्षेत्र खोजी गरेर अगाडि बढ्न आफूहरू तयार रहेको बताएका छन्।
शनिबार जनकपुर-पोखरा विमानसेवा शुरु भएपछि पहिलो उडानमा मधेश भ्रमणमा जनकपुरधाम पुगेका उनले सञ्चारकर्मीसँग कुरा गर्दै संघीयतालाई बलियो बनाउन र प्रदेश–प्रदेशबीचको सम्बन्ध बलियो बनाउनुपर्ने बताए।
शनिबार बिहान बुद्ध एयरको जहाजबाट जनकपुरधाम आइपुगेका पोखरेललाई मधेशका मुख्यमन्त्री लालबाबु राउतले स्वागत गरेका थिए। दुबै मुख्यमन्त्री, मन्त्री र सरकारी पदाधिकारी रेल चढेर कुर्थासम्म पुगी जनकपुरधाम फर्किएका थिए।
रेल चढ्न जनकपुरधाम रेल्वे स्टेशन पुगेका मुख्यमन्त्री पोखरेलले संघीयताको ऐना नै प्रदेश रहेको र प्रदेशलाई मजबुत बनाउन नसकिए संघीयता मजबुत बन्न नसक्ने बताए।
उनले पहिलाको एकल बहुमतको सरकार हटेर पाँच राजनीतिक दलको गठबन्धनको सरकार बने पनि संघीयतालाई मजबुत बनाउने सवालमा तात्त्विक भिन्नता नदेखिएको समेत बताए। उनले संघीयतालाई मजबुत बनाउन सातै प्रदेशका मुख्यमन्त्रीले राष्ट्रियस्तरमा सामूहिक रूपमा आवाज उठाउनुपर्ने जानकारी गराए।
प्रदेशहरू अस्तित्वमा आइसकेपछि अन्तरप्रदेश आदानप्रदान हुनुपर्ने मान्यताअनुसार आफू मधेशमा र मधेशका मुख्यमन्त्री गण्डकीमा पुगेको उनको भनाइ थियो।
दुबै प्रदेशको विकासमा साझेदारी गर्न पनि भ्रमण प्रभावकारी हुने बताए।
यस्तो छ मधेशमा कार्यक्रम
शनिबार जनकपुरधाम आएका पोखरेल आइतबार सोमबार प्रस्थान गर्नेछन्। यसबीचमा उनले जनकपुरधाम–धनुषाधाम मन्दिरमा पूजापाठ गर्नेछन् भने शनिबारै साँझ मधेश प्रदेशका मुख्यमन्त्री र मन्त्रीहरुसँग अन्तरसंवाद गर्नेछन्।
यसपछि उनी गंगासागर आरतिमा सरिक हुनेछन्। आइतबार बिहान जानकी मन्दिर, राजदेवी र राम मन्दिरमा पूजापाठ गरेर बर्दिबासमा खाजा खाने कार्यक्रम राखिएको छ।
त्यसपछि महोत्तरीको टुटेश्वर महादेव मन्दिरमा पूजा गर्दै सर्लाहीको भरत ताल र रौतहटको नुनथर तालको अवलोकन गर्नेछन्। मुख्यमन्त्री पोखरेलले पर्सा राष्ट्रिय निकुञ्ज र गढीमाई मन्दिरमा पूजा गरी जनकपुरधाम फर्किनेछन्।
सोमबार महोत्तरीको जलेश्वरनाथ महादेव मन्दिरमा पूजा गरेपछि खाजा खुवाएर उनको बिदाइ गर्ने कार्यक्रम रहेको मधेश प्रदेश सरकारले जानकारी दिए।
