वीरगंज । पर्सा प्रहरीले मोटरसाइकल फेला पारेर चोरलाई नियन्त्रणमा लिएको छ । शुक्रबार वीरगञ्ज महानगरपालिका-२१ ताजपुरबाट चोरी भएको ना. २९ प. २८८३ नम्बरको निलो रङ्गको डिस्कभर मोटरसाइकल चोरी भएको डेढ घण्टा भित्रै प्रहरीले मोटरसाइकल फेला पारेर चोरलाई नियन्त्रणमा लिएको हो ।
ताजपुर निवासी गोबिन्द महतोले आफ्नो घरको अगाडी पार्किङ्ग गरेर राखेको अवस्थामा मोटरसाइकल साँझ साढे ७ बजेको करिवमा चोरी भएको थियो । महतोले मोटरसाइकल चोरी भएको प्रहरीलाई जानकारी गराउनसाथ जिल्ला प्रहरी कार्यालय पर्साबाट खटेको प्रहरी टोलीले सोही राति ९ बजेको करिवमा परवानीपुर ढाटबाट चोरीसहित मोटरसाइकल फेला पारेको ।

प्रहरीले मोटरसाइकल चोरी गरेको आरोपमा सोही स्थान बस्ने ३६ वर्षीय दिनानाथ प्रसाद महतोलाई पक्राउ गरेको छ । दिनानाथविरुद्ध प्रहरीले चोरी कसूरमा अनुसन्धान गरिरहेको जिल्ला प्रहरी कार्यालय पर्साका प्रहरी नायव उपरीक्षक (डिएसपी) ओमप्रकाश खनालले जनाएका छन् ।