रौतहट। रौतहटको देबाही गोनाही नगरपालिकाका मेयर धर्मेन्द्र पटेल घुससहित पक्राउ परेका छन् । अख्तियार दुरुपयोग अनुसन्धान आयोगको टोलीले आइतबार पटेललाई घुस लिरहेको अवस्थामा नियन्त्रणमा लिएको हो । आयोगले पटेलसँगै उनका सहयोगी अशोक प्रसाद पटेल, योजना शाखाका प्रमुख मुकेश पटेल र सह-लेखापाल प्रदिप कुमार यादवलाई पनि घुसवापतको रकम चेक र नगदसहित पक्राउ गरेको हो ।
अख्तियार दुरुपयोग अनुसन्धान आयोगका प्रवक्ता श्याम कुमार भण्डारीका अनुसार प्रहरी नायव उपरीक्षक (डिएसपी) पुष्प मल्ल ठकुरीको नेतृत्वमा खटिएको टोलीले दुई लाख पचास हजार नगद र दुई लाख पचार हजारको चेकसहित उनीहरुलाई नियन्त्रणमा लिएको छ । सको रकम प्रकरणमा संलग्न भन्दै आयोगले उनीहरुविरुद्ध मुचुल्का उठाएर प्रक्रिया पुर्याउन झण्डै ४ घण्टा लागेको थियो । आयोगका प्रवक्ता भण्डारीले देबाही गोनाही नगरपालिकाको कार्यालयभित्र आयोगका कर्मचारीले नगरप्रमुख पटेलको कार्यकक्षबाट नगद र चेकको रकम बरामद गरेको पुष्टि गरेका थिए ।
‘घुसको रकमसहित पक्राउ गरिएको छ,’ उनलेभने, ‘कसले कुन कामको लागि घुस दिएको भन्ने अनुसन्धानबाट खुल्छ । आयोगको टोलीले नगरप्रमुख पटेलसहित चार जनालाई नियन्त्रणमा लिएको छ । बाँकी अनुसन्धानबाट खुल्छ ।’ देबाही गोनाही १ करुनियास्थित वडा कार्यालयको भवन निर्माणको काम सम्पन्न भएपछि अन्तिम भुक्तानी माग गर्दा नगरप्रमुख पटेलले उपभोक्ता समितिसँग ५ लाख घुस मागेको वडा अध्यक्ष शेख नुरुल्लाहले बताए ।
उपभोक्ता समितिका अध्यक्ष शेख तबरेजसहितको टोलीले वडा कार्यालय भवन निर्माणमा १० लाख भुक्तानी लिइसकेका थिए । अन्तिम किस्ताको रकम झण्डै ८ लाख लिनुपर्ने बाँकी थियो । नगरस्तरीय योजना अनुसार वडा कार्यालय भवन निर्माण गर्न नगरपालिकाबाट २० लाख बजेट बिनियोजन गरिएको थियो । नगरप्रमुख पटेलले समितिसँग कुनै किसिमको रकम माग नगरेको र उक्त रकमबारे आफूलाई केही थाहा नभएको आयोग समक्ष बताएका थिए ।
