परासी । आफ्नो पक्षमा मत तान्नका लागि भारतीय नेताहरुले मतदाताहरुलाई रक्सीको कुपन बाढ्ने गरेको पाइएको छ। भारतको उत्तर प्रदेशमा १९ गते (३ मार्च) विधान सभा चुनाव हुँदैछ। उत्तर प्रदेश अन्तरगत पर्ने महाराजगञ्ज जिल्लालाई नवलपरासी पश्चिमको साढे २७ कि.मि. क्षेत्रफलले छोएको छ।

यो क्षेत्रफलसँग जोडिएका दसगजा नजिकको नेपाली भूभागमा मदिरा पसल छ्याप्छ्याप्ती छन्। हप्ता दिनअघि देखि नै चुनावमा उठेका भारतीय नेताहरुले मतदाताहरुलाई रक्सीको कुपन दिएर सीमा क्षेत्रका नेपाली मदिरा पसलमा पठाउने गरेको पाइएको हो। ‘हप्ता दिनअघि भारतीय नेताहरु आएर कुपन ल्याएका व्यक्तिलाई रक्सी दिनु भनेर गएका छन्।’ दसगजा नजिकका एक नेपाली मदिरा पसलका व्यवसायीले भने। चुनावपछि कुपनका आधारमा रकम भुक्तानी गर्ने समेत ती व्यवसायीले बताए।

सीमा क्षेत्रका नेपाली मदिरा पसलमा भारतीय नागरिकले कुपन ल्याउने र त्यसैका आधारमा रक्सी दिने गरेको पाइएको नवलपरासी पश्चिमका प्रमुख जिल्ला अधिकारी धर्मेन्द्रकुमार मिश्रले बताए। भारतको महाराजगञ्ज जिल्लाका सीडीओसहित रुपन्देही र नवलपरासीका सुरक्षा निकायको बैठकमा समेत सीमा नाकामा चुनाव अवधिभर मदिरा बिक्री वितरण र सेवनमा रोक लगाउन भारतीय पक्षले आग्रह गरेको छ। त्यसलाई सकरात्मक लिदैं सहयोग गर्ने प्रतिबद्धता जनाएका छौं। छिमेकी देशको चुनावमा सहयोग गर्ने हाम्रो दायित्व पनि भएकाले सोही अनुसार लागेका छौं।’ प्रमुख जिल्ला अधिकारी मिश्रले भने।

नवलपरासीका नाका २ दिनका लागि बन्द
भारतसँग सीमाना जोडिएका पश्चिम नवलपरासीका नाका २ दिनका लागि शिल (बन्द) हुने भएका छन्। भारतको उत्तर प्रदेश राज्यको विधान सभा चुनावका लागि नाका शिल गर्न लागिएको जिल्ला अधिकारी मिश्रले जानकारी दिए।

नवलपरासी, रुपन्देही र भारत महाराजगञ्ज जिल्लाका सीडीओसहित सुरक्षा अधिकारीहरुको आइतबारको अनलाइन बैठकले फागुन १७ गते बेलुका ६ बजेदेखि १९ गते बेलुका ६ बजेसम्म नाका शिल गर्ने निर्णय गरेको प्रमुख जिल्ला अधिकारी मिश्रले बताए। नाका शिल भएको समयमा मानिसको आवतजावत समेत पूर्ण रुपमा रोकिने छ। चुनावको अघिल्लो दिन (१८ गते) सम्म भने मतदाताहरु मात्र परिचय पत्रका आधारमा भारत जान पाउने छन्।

यो जिल्लामा १९गते (३ मार्च) चुनाव हुँदैछ। १६ गतेदेखि सीमा नाकामा दुवै देशका सुरक्षाकर्मीहरुले संयुक्त गस्ती गर्ने छन्। बैठकमा नेपाली पक्षले राखेको बैशाख ३० गतेको स्थानीय निर्वाचनलाई सहयोगको आग्रहलाई पनि भारतले पूर्ण सहयोग गर्ने प्रतिबद्धता जनाएको प्रजिअ मिश्रले बताए।