वीरगन्ज । वीरगन्जमा मिटरको मनोमानी रकम असुल्दै विद्युत प्राधिकरण | नेपाल विद्युत् प्राधिकरण, वीरगन्ज वितरण केन्द्रमा मिटर अभावको विषयलाई लिएर कर्मचारीहरूले अनियमितता गरिरहेको पाईएको छ ।विगत केही महिना देखि वितरण केन्द्रमा मिटरको अभाव छ । त्यसैको फाइदा उठाउँदै कर्मचारीहरूले बढी रकम दिनेहरूलाई मिटर दिने र तोकिएको मिटरको शुल्क तिरेर लिन खोज्नेहरूलाई अलमल्याउँदै आएका हुन् ।
केन्द्रमा अहिले चार हजार पाँच सय नयाँ मिटरको माग छ । केन्द्रले यसका लागि टेन्डर आह्वान गरेको र सबै प्रकृया पूरा भएर मिटर वितरणको लागि तीन महिना अझै समय लाग्ने केन्द्रका कर्मचारी सीताराम साहले बताए । तर, यसको फाइदा उठाएर कर्मचारीहरूले सेवाग्राहीसँग लूट मचाएका छन् ।
एउटा मिटरको ३ हजार रूपैयाँ शुल्क लाग्ने भए पनि अहिले १२ हजार रूपैयाँ लिएर मिटर जडान कार्य भइरहेको छ । १२ हजार दिनेलाई सहज रूपमा मिटर जडान भइरहेको स्रोतले जनाएको छ । ९ हजार कर्मचारीहरूले राख्ने र तीन हजार राजस्व दाखिला गरेर अहिले विद्युत् प्राधिकरणमा मिटरको नाममा लूट मचाइएको छ ।
एक जना सेवाग्राहीले परल शुल्कमा मिटर जडान गराउँनको लागि तीन महिना देखि विद्युत् प्राधिकरण धाउँदै आएको बताए । आफूसँग ९ हजार अतिरिक्त रकम माँग गरेको र सो रकम नदिंदा तीन महिना देखि मिटर उपलब्ध नगराइएको उनले बताए । मिटरको मूल्य भन्दा ९ हजार बढी दिनेलाई मिटर उपलब्ध हुँदै आएको उनले आरोप लगाएका छन् ।
