वीरगंज | पर्सामा शनिवार मृत अवस्थामा एक बालिकाको शव भेटिएको छ । पर्साको वीरगंज महानगरपालिका वडा नं. ७ रामटोलमा वीरगंज १६ नगवा निवासी ९ बर्षिय रिजवान खातुन मृत अवस्थामा भेटिएको जिल्ला प्रहरी कार्यालय पर्साले जनाएको छ । मृतक बालिका आफ्न्तसँगै वीरगंज १५ भिस्वामा डेरा गरी वस्दै आएकी थिइन् ।
प्रहरीले बालिकाको हत्या भएको हुनसक्ने भन्दै अनुसन्धान शुरु गरेको छ । प्रहरीले बालिकाको शव भेटिएको अवस्थामा तालिम प्राप्त कुकुर सहितको प्रहरी टोली परिचालन गरेको थियो । कुकुरले पहिचान गरेको अधारमा प्रहरीले ३ जनालाई पक्राउ गरेको छ । उनीहरुसँग सोधपुछको काम भइरहेको पर्साका प्रहरी प्रवक्ता ओमप्रकाश खनालले बताए ।त्यसै यस अघि शुक्रवार पर्साको जगरनाथपुर गाउँपालिका–६ सन्ठीमा एक जना बालकको शव भेटिएको थियो । स्थानीय नागेश्वर पटेलका १२ वर्षीय छोरा मन्टु पटेल मृत भेटिएका थियो ।गाउँको पूर्वपट्टी उखुबारीमा घाँस काट्न गएकी महिलाले बालकको शव देखेपछि गाउँमा खबर गरेकी थिइन् ।
बालक चारदिनदेखि हराएका थिए । खोजतलासको लागि प्रहरीमा आफ्न्तले उजुरी समेत दिएका थिए । घाँटीमा गम्छा बेरिएकोछ, एउटा आँखा फुटेको छ भने अनुहारभरी रगत देखिएको छ । घटनालाई शंकास्पद तथा अनुसन्धान शुरु गरिएको इलाका प्रहरी कार्यालय पोखरीयाले जनाएको छ ।घटनामा संलग्न रहेको आशंकामा प्रहरीले चार जनालाई निगरानीमा राखेर अनुसन्धान गरिरहेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक (डीएसपी) ओम प्रकाश खनालले जानकारी दिए । शुक्रवार वीरगंजको इनर्वामा अर्को एकको जना शव भेटिएको थियो ।
शंकास्पद अवस्थामा धमाधम शव भेटिन थाले पछि पर्सा आंतकित बनेको छ । पछिल्लो समय पर्साको शान्ति सुरक्षा कमजोर भएको पर्सावासीले महशुस गर्न थालेका छन् । प्रहरी तस्करी गराउँन,जुवा खेलाउन मस्त रहेको तथा शान्ति सुरक्षामा ध्यान नदिएको नागरिक अगुवाहरुको भनाई छ ।
