वीरगन्ज । विश्व स्वास्थ्य संगठन (डब्ल्यूएचओ)का प्रमुख डा. टेड्रोस अधानम गेब्रेयेससले सन् २०२२ मा कोभिड–१९ को महामारी अन्त्य हुने विश्वास व्यक्त गरेका छन्।
उनले यो महामारी अन्त्यको लागि विश्वका सबै मुलुकले एकसाथ कााम गर्नुपर्ने बताएका छन्।
उनले ‘संकीर्ण राष्ट्रवाद र खोप जमाखोरी’ले महामारी अन्त्यको लागि चुनौती थपेको उल्लेख गरे। कोरोना भाइरसको पहिलो संक्रमण पुष्टि भएको दुई वर्षपछि डब्ल्यूएचओका प्रमुखले यस्तो बताएका हुन्।
अहिले विश्वभर कोरोना संक्रमितको संख्या २८ करोड ७० लाख नाघेको छ भने करिब ५५ लाख मानिसको संक्रमणको कारण मृत्यु भएको छ।
गेब्रेयेससले अहिले कोभिड–१९ को उपचारको लागि धेरै किसिमको उपकरण रहेको भन्दै यो भाइरस सामान्य बन्दै जाने विश्वास व्यक्त गरे।
उनले अहिले खोप वितरणमा चरम असमानता देखिएको भन्दै असमानताको अन्त्य गर्न सके महामारी आफैं अन्त्य हुने बताए।
डब्ल्यूएचओले आगामी जुलाईसम्म विश्वका ७० प्रतिशत मानिसलाई कोरोना खोप दिँदै महामारी अन्त्य गर्ने लक्ष्य राखेको छ।
