वीरगंज | नेकपा (एकीकृत समाजवादी) को प्रदेश २ की सांसद मन्जु यादवले लालबाबु राउत सरकार झुठको खेती गरिरहेको आरोप लगाएकी छन्। प्रदेशको नाम र राजधानी चार वर्षसम्म टुंगो नलगाएर सरकार र सांसदहरू जनतामा हावादारी कुरा गरिरेको उनको आरोप छ। शुक्रबार बसेको प्रदेश सभाको बैठकमा बोल्दै सतारुढ दलकी सांसद यादवले नै सरकारविरुद्ध यस्तो टिप्पणी गरेकी हुन्।

‘मधेश प्रदेश, जानकी प्रदेश, मिथिला भोजपुरा प्रदेश यी प्रस्तावित नामहरु सरकार र हामी सांसदले फेल गराएका होइनौं?’ प्रश्न गर्दै उनले भनिन् ‘सगरमाथाको चुचुरो छुने खालको गफ दिएर हावादारी कुरा गर्ने, जनतामा भ्रम छर्ने काम सरकारले गरिरहेका छ। के हामी फटाहा सांसद हौँ?’उनले एकपटक सबै प्रस्तावित नामहरु फेल भइसक्दा दुई वर्षपछि पुनः छुट्टाछुट्टै त्यहीँ प्रस्ताहरु ल्याउनु उचित नभएको बताइन्।

‘सरकार र सत्तारुढ दलहरूले फेरि अलग अलग प्रस्ताव ल्याएर नाटक किन गर्नु पर्यो? मुख्यमन्त्री, मन्त्री बन्न सहमति हुने, अनि प्रदेशको नामको प्रस्ताव फरक फरक ल्याउने? त्यसको लागि समन्वय गरेर एउटा नाम ल्याउनु पर्दैन्थो?’ उनले सदनमा प्रश्न गर्दै भनिन् , ‘बरु प्रमुख प्रतिपक्षी दल लोसपाको भूमिका मलाई ठिक लाग्यो, सत्तारुढ दलकै प्रस्तावमा समर्थन गर्यो।’

प्रदेश २ मै रहेको पुरानो विश्व विद्यालयका कलेजहरु धारासायी भइरहेको बेला त्यसको सुधार नगरी पुनः सदमा छलफलै नगरी अध्यादेश ल्याएर कृषि विश्व विद्यालय स्थापना गर्न लागेकोमा पनि सांसद यादवले असन्तुष्टि प्रकट गरिन्।