वीरगंज । नेकपा एमालेको अध्यक्षमा केपी शर्मा ओली निर्वाचित भएका छन् । उनले २०९६ मतमध्ये १८३७ मत ल्याएको निर्वाचन आयोगका अध्यक्ष डा. विजय सुब्बाले जानकारी दिए ।उनका अनुसार ओलीसँग पराजित नेता भीम रावलले २२३ मत ल्याएर पराजित भएका छन् ।

अध्यक्षका प्रत्यासीमा ३६ जनाले दुवै नेतालाई मतदान गरेनन् । सुब्बाका अनुसार वरिष्ठ उपाध्यक्षमा ईश्वर पोखरेल निर्विरोध निर्वाचित भएका छन् ।उपाध्यक्षमा अष्टलक्ष्मी शाक्यले १९७६, युवराज ज्ञवालीले १८४२, रामबहादुर थापा बादलले १७६८, विष्णु पौडेलले १८५६, सुरेन्द्र पाण्डेले १९२५, सुवास नेम्वाङले १८६५ मत प्राप्त गर्दै विजयी भएका छन् ।

घनश्याम भुसाल ७२५ मतसहित पराजित भएका छन् ।महासचिवमा शंकर पोखरेल निर्विरोध निर्वाचित भएका छन् । उपमहासचिवमा तीनैजना नेता निर्विरोध निर्वाचित भएका छन् ।प्रदीप ज्ञवाली, पृथ्वीसुब्बा गुरुङ र विष्णु रिमाल उपमहासचिवमा निर्विरोध निर्वाचित भएका हुन् ।

त्यस्तै सचिवमा गोकर्ण विष्ट १९७४, छविलाल विश्वकर्मा १८०३, टोपबहादुर रायमाझीले १८०४, पद्मा अर्यालले १७९९, योगेश भट्टराईले १९६०, रघुवीर महासेठले १५००, लेखराज भट्टले १७०४ मत प्राप्त गर्दै विजयी भएका छन् । टंक कार्कीले ५६० र भीम आचार्यले ७८९ मत प्राप्त गरी पराजित भएका छन् ।