वीरगन्ज । बीरगन्जस्थित आईसिपीबाट गत चार महिनामा ३९ अर्ब बराबरको नेपाली उत्पादन सामान निकासी भएको छ । चालु आर्थिक वर्ष २०७८/०७९ को ४ महिनामा भारत तथा तेस्रो मुलुकमा ३८ अर्ब ७३ करोड ३१ लाख २४ हजार मूल्य बराबरको नेपाली उत्पादन निकासी भएको छ । बीरगन्ज नाकाबाट भटमासको प्रशोधित तेल मात्रै १७ अर्ब २० करोड ९० लाख ९ हजार बराबरको ७ करोड ५९ लाख ३३ हजार २१ सय ५३ किलो निर्यात भएको बीरगन्ज भन्सार कार्यालयको तथ्याङ्कले देखाएको छ ।

त्यसैगरी, प्रशोधित पाम आयल १३ अर्ब ४० करोड ७८ लाख २२ हजार मूल्य बराबरको निर्यात भएको छ भने डाबरको उत्पादन तथा अन्य फलफूलको जुस १ अर्ब ८४ करोड ४७ लाख ५७ हजार मूल्य बराबरको निकासी भएको छ ।
त्यसैगरी, सो अवधिमा सूर्यमुखी प्रशोधित तेल १ अर्ब ५८ करोड २ लाख ६१ हजार मूल्य बराबरको भारत तर्फ निकासी भएको छ भने भटमासको पिना मात्रै ६१ करोड ६८ लाख ९४ हजार रुपैयाँको भारत तर्फ निकासी भएको वीरगंज भन्सार कार्यालयका प्रमुख भन्सार प्रशासक विश्व प्रसाद अर्यालले जानकारी दिए ।

यसैगरी, बीरगन्ज भन्सार नाकाबाट भारत तथा तेस्रो मुलुक तर्फ जमोठ कपडा, बतिसा, त्रिफला, च्यावनप्रास, सेन्थेटिक यार्न, स्पोर्ट सुज, सेन्थेटिक सुज, दन्तमन्जन, ऊनी गलैँचा, होमियोपैथिक तथा आयुर्वेदिक औषधी, तयारी कपडा लगायतका सामानहरू भारत तथा तेस्रो मुलुकमा निर्यात भएको बीरगन्ज भन्सार कार्यालयका प्रमुख भन्सार अधिकृत हरिहर पौडेलले जानकारी दिए ।