पर्सा | पर्सामा अवैध रुपमा प्रतिवन्धित गाँजाको खेती फेरि फस्टाएको छ। खासगरि जिल्लाको राष्ट्रिय जंगलसित सीमाना जोडिएका ग्रामीण भेगहरुमा गाँजाको खेती भएको पाइएको छ।जंगलसित सीमाना जोडिएका गाउँहरुमा खेतमा लुकाएर यहाँका स्थानीयले गाँजा खेती गरेका छन्। स्थानीयले वरिपरी अन्य बाली र बीचमा गाँजाका बोट लगाउने गरेका छन्।पर्साको जंगलको बाटो भएर चितवन, मकवानपुर र धादिङ जिल्लामा लगाइएको प्रतिबन्धित गाँजात लुकाइछिपाइ तस्कर र भरियाहरुले भारततर्फ तस्करी गर्ने गरेका छन्।

उनीहरुले भारत गाँजा पठाउनको लागि पर्साका ग्रामीण भेगलाई ट्रान्जिट प्वाइन्ट बनाएका छन्। त्यसैको सिको गर्दै पर्साका स्थानीयहरुले पनि गाँजा खेती गर्न थालेका हुन्। सोही क्रममा शनिबार पर्सा प्रहरीले पर्साको ठोरी गाउँपालिकामा लगाइएको ८ बिगाहा गाँजा खेती नष्ट गरेको छ। ठोरी गाउँपालिकाको वडा ३ र ४ मा लगाइएको गाँजा खेती प्रहरीले फँडानी गरी नष्ट गरेको हो।

गाँजाको दुई लाख बोटहरू फडानी गरी नष्ट गरेको पर्साका प्रहरी प्रवक्ता एवं प्रहरी नायब उपरीक्षक ओम प्रकाश खनालले जानकारी दिए। गाँजा खेतीमा सलंग्न व्यक्तिहरूको पहिचान तथा खोजतलास गरी कानुन बमोजिम कारवाही हुने खनालले बताए। यस्तै गत हप्ताको सोमबार पनि ठोरी गाउँपालिकामै ११ बिगाहामा लगाइएको गाँजा खेती प्रहरीले नष्ट गरेको थियो।