काठमाडौँ । केही दिनदेखि लगातार बढेको शेयर बजार विहीबार भने उच्च अंकले घटेको छ । साताको पहिलो दिन आइतबार १.३८ अंकले घटेको बजार त्यसपछि ३ दिन सोमबार २६.४४, मंगलबार ६९.२२ र हिजो बुधबार १६.९५ अंकले बढेको थियो ।

नेपाल स्टक एक्सचेञ्ज लिमिटेड(नेप्से) का अनुसार आज बजार ३२.३९ अंकले घटेको हो । १.१६ प्रतिशतले बजार घट्दा नेप्से परिसूचक २७६९.१३ अंकमा झरेको छ । आज २२४ कम्पनीका ९८ लाख ६२ हजार ९ सय ४० कित्ता शेयर किनबेच हुँदा ६ अर्ब २७ करोड १८ लाख ६७ हजार २ सय ३० रुपियाँ बराबरको कारोबार भएको छ । शेयर बजारमा आइतबार ४ अर्ब ९ करोड ६२ लाख १९ हजार ५ सय २५.४० रुपियाँ, सोमबार ४ अर्ब ७३ करोड ४६ लाख ५१ हजार ४ सय ४४ रुपियाँ, मंगलबार ५ अर्ब ५२ करोड १६ लाख ५० हजार ८ सय ५६ रुपियाँ र बुधबार ७ अर्ब ३७ करोड ९४ लाख ४६ हजार ८ सय २० रुपियाँ बराबरको कारोबार भएको थियो ।

बजार ओरालो लागेको दिन आज सबै समूह राताम्मे भएका छन् । सबैभन्दा बढी जीवन बीमा समूह २२७.४६ अंकले घटेको हो । बजार घटे पनि २ कम्पनीको शेयर मूल्यमा भने पोजेटिभ सर्किट लागेको छ । आज मानुषी लघुवित्त र तेह्रथुम पावरको शेयर मूल्य क्रमशः १० र ९.९९ प्रतिशतले बढेको हो । त्यसैगरी मैलुङ खोला जल विद्युतको शेयर मूल्य सबैभन्दा बढी ५.०३ प्रतिशतले घटेको छ ।

नेप्सेका अनुसार आज नेपाल दूरसञ्चार कम्पनी लिमिटेड(नेपाल टेलिकम) को उच्च कारोबार भएको छ । नेपाल टेलिकमको ६० करोड ४४ लाख ५५ हजार ४ सय १२.९० रुपियाँ बराबरको कारोबार भएको हो ।