जनकपुरधाम | दुई समुदायबीच भएको झडपका कारण जनकपुरधाममा लगाइएको निषेधाज्ञालाई बढाइएको छ।शनिबार जिल्ला प्रशासन कार्यालय धनुषाले जनकपुरधाम उपमहानगरपालिका वडा नं. २० मा लगाएको निषेधाज्ञालाई मंगलबार राति १० बजेसम्मको लागि बढाउने निर्णय गरेको प्रमुख जिल्ला अधिकारी बन्धु प्रसाद बास्तोलाले जानकारी दिए।
वडा नं. २० मा छठ पर्वमा अर्घ राख्नका लागि बनाउन लागेको घाटको विषयमा हिन्दु–मुस्लिम समुदायबीच विवाद हुँदा उग्ररुप लिएपछि स्थानीय प्रशासनले शनिबारदेखि आइतबार रातिसम्मको लागि निषेधाज्ञा जारी गरेको थियो।प्रजिअ बास्तोलाले शान्ति सुरक्षाको अवस्थालाई मध्यनजर गर्दै मंगलबार राति १० बजेसम्मका लागि निषेधाज्ञा पुनः बढाइएको जानकारी दिए।
जिल्ला प्रशासन कार्यालयले भेला जुलुस, प्रदर्शन, घेराउ, र्याली, सभाजस्ता क्रियाकलाप गर्न रोक लगाएको छ। आदेशको उल्लंघन गर्नेलाई कानून बमोजिम कारवाही गर्न सकिने जनाइएको छ।पूर्वमा जलाद नदीको कर्ली बाँध, पश्चिममा जनकपुर–जटही मार्ग दोबाटो, उत्तरमा हनुमाननगर रामपुर बहुअर्वा जाने बाटो र दक्षिणमा देवपुरा निमचौकदेखि बहुअर्वा जाने बाटोसम्म निषेधाज्ञा जारी गरिएको छ।
