वीरगञ्ज | तराईवासीहरुको महान पर्व छठ पूजाको तयारी तीव्र रुपमा भइरहेको छ। तराईमा निकै आस्थाका साथ मनाइने छठ पर्वको लागि अहिले आवश्यक पूजा सामग्रीहरु किनमेल गर्नेदेखि छठ घाट सजाउने कार्यले तीव्रता पाएको छ।पर्साका स्थानीयवासीहरु छठ पूजा गरिने नजिकैको नदी, तलाउ, पोखरीलाई धमाधम सजाइरहेका छन्। छठपर्वको लागि चाहिने बाँसको छैठा, सुपली, फलफूल, नरिवललगायतका सामानको लागि बजारमा व्रतालु तथा उनका परिवारका सदस्यहरुको भीड लागेको छ।

त्यस्तै गाउँ तथा सहरहरुमा छठ घाटलाई सजाउन र घाटसम्म पुग्ने बाटोको पनि सजावट गर्ने गरिन्छ। जसका लागि स्थानीयवासीहरुले चन्दा संकलन गरी छठ घाट सजाउने गरेका छन्। अहिले घरघरमा छठ पूजाको लागि चाहिने ठेकुवा बनाउन प्रयोग गरिने गहुँलाई सुकाउने र ठेकुवा बनाउनको लागि प्रयोग हुने माटोको चुल्होसमेत बनाउनमा व्रतालुहरु व्यस्त छन्।

पाँच दिनसम्म मनाइने छठ पर्वको आज दोस्रो दिन व्रतालुहरुले नुहाएर प्याज र लसुन नमिसाइएको खाना खाएका छन्। जसलाई ‘नहाए खाए’ पनि भनिन्छ। मंगलबार छठ पर्वको तेस्रो दिन व्रतालुहरु माटोले बनाइएको चोखो चुल्होमा खीर र रोटी आँपको दाउराले पकाएर खाने गर्छन्। जसलाई खरना भनिन्छ। चौथो दिन छठ व्रतालुहरुले छठ पूजाको लागि चाहिने पूजा सामग्री बाँसको छैठा सुपलीमा राखेर नजिकैको छठ घाटमा गएर अस्ताउँदो सूर्यको पूजा गर्छन्। जसलाई भोजपुरीमा ‘सझियाँ घाटे’ पनि भन्ने गरिन्छ।छठ पर्वको अन्तिम तथा पाँचौं दिन व्रतालुहरुले छठ पूजाको सामग्री राखिएको बाँसको छैठी सुपली लिएर फेरि नजिकैको छठ घाट जान्छन्। जहाँ उदाउँदो सूर्यलाई अर्घ दिइने गरिन्छ। उदाउँदो सूर्यलाई व्रतालुहरुले अर्घ दिएपछि छठ पर्व विधिवत रुपमा समापन भएको मानिन्छ।