वीरगञ्ज | जिल्ला प्रशासन कार्यालय पर्साले पछिल्लो तीन महिनामा चार हजार ६५९ जनालाई नयाँ नागरिकता प्रदान गरेको छ। जिल्ला प्रशासनले चालू आर्थिक वर्ष २०७८/७९ को साउन, भदौ र असोज तीन महिनामा चार हजार ६ सय ५९ जनालाई नयाँ नागरिकता प्रदान गरेको हो।आर्थिक वर्ष २०७८/७९ को पहिलो महिना साउनमा एक हजार ४३५, भदौमा एक हजार ९८२ र असोज महिनामा एक हजार २०२ जनाले नयाँ नागरिकता लिएका छन्। सोही अवधिमा जिल्लाका २ हजार ८०६ जनाले प्रतिलिपि नागरिकता लिएको जिल्ला प्रशासन कार्यालय पर्साको तथ्यांकमा उल्लेख छ।

आर्थिक वर्ष २०७७/७८ मा भने सोही अवधिमा जिल्ला प्रशासनले ८ हजार ९४६ जनालाई नयाँ नागरिकता उपलब्ध गराएको थियो। सोही वर्ष पाँच हजार ४८७ जनाले प्रतिलिपि नागरिकता लिएका थिए। चालू आर्थिक वर्षको सुरुको तीन महिनाको अवधिमा जिल्लाका चार जनाको नागरिकता रद्द गरिएको जिल्ला प्रशासनले जानकारी दिएको छ। जसमा भदौमा दुई र असोजमा दुई गरी चारजनाको नागरिकता रद्द गरिएको हो।

गत आर्थिक वर्षको सोही अवधिमा भने दुई जनाको नागरिकता रद्द भएको थियो। चालू आर्थिक वर्षमा ३ हजार ४१ जना व्यक्तिहरुको जिल्ला प्रशासनमा राष्ट्रिय परिचयपत्र विवरण दर्ता भएको छ। जिल्ला प्रशासनबाट प्राप्त हुने सेवाअन्तर्गत पर्साका २ हजार ६१६ जनाको राहदानी सिफारिस गरिएको छ। जसमध्ये साधारण सिफारिस २ हजार ८६ जनाको र ५३० जनाको द्रूत सिफारिस गरिएको पर्साका सहायक प्रमुख जिल्ला अधिकारी एवं सूचना अधिकारी भीमकान्त पौडेलले जानकारी दिए।

द्रूत सिफारिस गरिएका राहदानी काठमाडौँमा गई एक हप्तामै निकाल्न सकिन्छ। तर त्यसको लागि अतिरिक्त शुल्क भने लाग्ने गर्दछ। साधारण सिफारिस गर्दा एक महिनाभन्दा बढी समयपछि सेवाग्राहीले राहदानी पाउने गरेका छन्। यसैगरी चालू आर्थिक वर्षको सुरुको तीन महिनाको अवधिमा पर्सामा २१ वटा संघसंस्थाहरु दर्ता भएको सहायक प्रजिअ पौडेलले बताए। जसमध्ये साउनमा ७, भदौमा ५ र असोजमा ९ वटा संस्था जिल्ला प्रशासन कार्यालयमा दर्ता भएका छन्। यसैगरी सोही अवधिमा ७२ वटा संघसंस्था नवीकरण भएका छन्। गत आर्थिक वर्ष २०७७/७८ मा भने सोही अविधमा पर्सामा २ हजार ३२० वटा संघसंस्था दर्ता भए भने १६१ वटा संस्थाले नवीकरण गरेका थिए।राम मण्डल