वीरगंज | एक अध्ययनका अनुसार विश्वका एक प्रतिशत धनीहरुको ‘कार्बन फुटप्रिन्ट’ विश्वव्यापी तापमानवृद्धि १.५ डिग्रीसेल्सियसमा सीमित गर्नका लागि आवश्यक पर्ने भन्दा ३० गुणा बढीको मार्गमा छ । तर गरिब ५० प्रतिशतबाट भएको उत्सर्जन निर्धारित जलवायु लक्ष्य भन्दा तल नै रहेको प्रतिवेदनमा उल्लेख छ ।
दुई युरोपियन वातावरणीय एजेन्सीले गरेको अध्ययनको प्रतिवदेनमा विश्वका नेताहरु जलवायु परिवर्तन सम्बन्धी संयुक्त राष्ट्रसंघीय सम्मेलन कोप–२६ स्कट्ल्याण्डको ग्लास्गोमा जारी रहेका बेला आएको हो ।अक्सफामकी नाफ्कोतो दाबीले भनेकी छन्, ‘सानो धनी समूहसँग प्रदूषण गर्ने फ्री पास रहेको देखियो ।’ स्टकहोम वातावरण इन्स्टिच्यूट र इन्स्टिच्यूट फर युरोपियन इन्भाइरोमेन्टल पोलिसीले अध्ययन गरेका हुन् ।
अत्यधिक मात्रामा भएको उत्सर्जनले विश्वभर नै अतिशय विषम मौसमी विपदलाई सहयोग गरेको र तापमानवृद्धि सीमित गर्ने लक्ष्यमा गम्भीर चुनौति खडा गरेको प्रतिवेदनमा उल्लेख छ ।
जलवायु वैज्ञानिकहरुले पृथ्वीको तापक्रम औद्योगिक क्रान्ति पूर्वको तुलनामा १.५ डिग्रीसेल्सियस भन्दा बढीले वृद्धि हुने गरी वायुमण्डलमा हरितगृह ग्यासको उत्सर्जन हुने क्रम जारी रहेको चेतावनी दिँदै आएका छन् । सन् २०३० सम्ममा पृथ्वीले संलेशण गर्न सक्ने कार्बन मात्रै उत्सर्जन गर्नु पर्ने वैज्ञानिकको भनाई छ ।