जनकपुरधाम | तराई मधेसमा दीपावलीको रौनक छाएको छ। दीपावलीको लागि केही दिनदेखि नै घरआँगन, सडक, बारीलगायतका स्थान सफा गरिएको छ। तर जनकपुरधाम नगर क्षेत्र अहिले पनि दुर्गन्धित नै रहेको छ। दीपावलीको पूर्वसन्धामा चोक, सडकहरुमा फोहर थुप्रिएको छ।

अन्य समयमा भन्दा दीपावलीमा सर्वसाधारणले विशेष सरसफाइ गर्ने गर्छन् तर उपमहानगरपालिकाले अहिलेसम्म फोहर व्यवस्थापन गरेको छैन। उपमहानगरले फोहर नउठाएपछि नगर नै दुर्गन्धित भएको छ। जनकपुरधामको मुख्य चोक, सडक, अस्पताल क्षेत्रमा फोहर थुप्रिएको छ।

जनकपुरधाम उपमहानगरले सरसफाइमा लाखौँ खर्च गर्छ तर सरसफाइ प्रभावकारी हुने गरेको छैन। उपमहानगरपालिकाले सरसफाइको लागि एक सयभन्दा बढी कर्मचारी राखेको उपप्रमुख रीताकुमारी मिश्रले बताइन्।
उपमहानगरले फोहर नउठाएपछि केही दिनअघि वडाध्यक्षहरुले फोहर उठाएर नगर प्रमुख लालकिशोर साहको घर अगाडि थुपारेका थिए। त्यसपछि उपमहानगरका निमित्त प्रमुख प्रशासकीय अधिकृत मिहीलाल र आन्दोलनरत वडाध्यक्षहरुबीच तीन दिनभित्र फोहर उठाउने सहमति भएको थियो। तर सहमतिको तेस्रो दिनसम्म पनि फोहर नउठेको वडा नं. ७ का अध्यक्ष जानकीराम साहले बताए। उनले नगर क्षेत्रबाट फोहर नउठ्दा स्थानीयबाट धेरै आलोचना खेप्नुपरेको जानकारी दिए।
उपमहानगरले आर्थिक वर्ष २०७६÷७७ मा तिहार, छठ र विवाह पञ्चमीको लागि विशेष सरसफाइको नाउँमा २० लाख रुपैयाँ विभिन्न संघसंस्था तथा व्यक्तिलाई दिएको महालेखापरीक्षकको प्रतिवेदनमा उल्लेख गरिएको छ।
उपमहानगरकी उपप्रमुख मिश्रले मेयरको कारण जनकपुरधामको सरसफाइ हुन नसकेको आरोप लगाइन्।