काठमाडौँ । सरकारले चैत महिनासम्म सम्पूर्ण नागरिकलाई कोरोना भाइरस (कोभिड १९) विरुद्धको खोप लगाइसक्ने लक्ष्य राखेको छ । सो अनुसार असोज मसान्तसम्म ३३ प्रतिशत नागरिकहरूलाई खोप लगाइसक्ने लक्ष्य राखेको थियो ।यद्यपि, असोज २९ गतेसम्म सरकारले लक्ष्यको झन्डै ३० प्रतिशत नागरिकलाई मात्रै खोप लगाएको छ । असोज महिना सकिन दुई दिन मात्रै बाँकी रहँदा सरकारले थप ३ प्रतिशत नागरिकलाई खोप लगाउन सक्ने सम्भावना कम देखिएको छ ।

स्वास्थ्य तथा जनसङ्ख्या मन्त्रालयले करिब २ करोड १८ लाख नागरिकलाई खोप लगाउने लक्ष्य राखेको छ । सरकारले सम्पूर्ण नागरिक भन्ने गरेको सङ्ख्या हो २ करोड १८ लाख ।असोज २९ गतेसम्मको तथ्याङ्क हेर्दा ६४ लाख ६० हजार १ सय ५९ जनाले कोरोना भाइरसविरुद्धको पूर्ण खोप लगाएका छन् । यो सङ्ख्या लक्ष्यको २९.७ प्रतिशत हो ।स्वास्थ्य मन्त्रालयको तथ्याङ्क अनुसार असोज २७ गते २ हजार २ सय ७५ जनाले खोप लगाएका छन् । यस्तै असोज २८ गते ४ हजार ७ सय ८४ जनाले खोप लगाएका छन् । असोज २९ गते खोप लगाउनेको सङ्ख्या शून्य छ ।

दसैँको माहौल जारी रहँदा असोज ३० र ३१ गते पनि उल्लेख्य सङ्ख्यामा खोप लाग्ने सम्भावना भने न्यून देखिन्छ । यसो हुँदा सरकारले असोज मसान्तसम्म ३३ प्रतिशत नागरिकलाई खोप लगाउन सक्ने सम्भावना कम देखिन्छ ।तत्कालीन स्वास्थ्य मन्त्री कृष्णगोपाल श्रेष्ठ एवं स्वास्थ्य राज्यमन्त्री उमेश श्रेष्ठले पटक पटक असोज मसान्तसम्म ३३ प्रतिशत नागरिकलाई खोप लगाउने बताएका थिए ।

असोज २९ गतेसम्मको तथ्याङ्क हेर्दा १ करोड ४८ लाख ५७ हजार ५ सय ६१ डोज खोप लगाइ सकिएको छ ।स्वास्थ्य सेवा विभागका डा. उपेन्द्र ढुङ्गानाका अनुसार हालसम्म करिब १ करोड ८८ लाख डोज खोप नेपाल भित्रिएको छ ।