अमेरिका | अमेरिकाले कोरोना भाइरसविरुद्धको खोपको पूर्णमात्रा लगाएकाहरुका लागि यात्रा प्रतिबन्ध फुकुवा गर्ने भएको छ ।आउँदो नोभेम्बर ८ देखि ३३ देशका यात्रु, जसले खोपको पूर्णमात्रा लगाएका छन्, उनीहरुका लागि सीमा पूर्णरुपमा खुला हुने अमेरिकाले जनाएको हो ।राष्ट्रपति कार्यालय ह्वाइट हाउसले जारी गरेको नयाँ नियम अनुसार खोपको पूर्णमात्रा लगाएका तथा यात्राको ७२ घण्टा भित्रको परीक्षणमा कोरोना भाइरसको संक्रमण नदेखिएकाहरु अमेरिका प्रवेश गर्न पाउने छन् ।

अमेरिकामा गएको वर्षको सुरुवातदेखि नै कडा यात्रा प्रतिबन्ध कायम छ । सार्वजनिक स्वास्थ्यलाई ख्यालमा राखेर यात्रा सम्बन्धी निर्देशिका जारी गरिएको र यो क्रम कायम रहने ह्वाइट हाउसका प्रवक्ताले बताएका छन्।नयाँ नियम युरोपका २६ देशहरुको समूह शेन्जेनसँगै बेलायत, ब्राजिल, चीन, भारत, इरान, आयरल्याण्ड र दक्षिण अफ्रिकाका लागि लागु हुनेछ ।

अमेरिकाको फुड एण्ड ड्रग एड्मिनिस्ट्रेशन (एफडिए) ले स्वीकृत गरेको वा विश्व स्वास्थ्य संगठन (डब्लुएचओ) ले आपतकालीन प्रयोगको अनुमति दिएको खोप लगाएकाहरु यात्राका लागि योग्य हुने जनाइएको छ ।अमेरिका प्रवेशपछि यात्रुहरु क्वारेन्टिमा बस्नु पर्ने छैन।