निजी भारतीय कार जिप नेपाल प्रवेशमा वीरगञ्ज भन्सार बाधक, होटेल तथा पर्यटन ब्यवसायी निराश

वीरगंज संजाल

१४ आश्विन २०७८, बिहीबार १३:०६

३२७७

वीरगञ्ज । औपचारिक रुपमा सबै सीमानाका खुल्ला गर्ने नेपाल सरकारले निर्णय गरेको एक साता बितिसक्दा पनि निजी सवारी नेपाल प्रवेश गर्न नपाएपछि होटेल तथा पर्यटन ब्यवसायीहरु निराश भएका छन् । गृह मन्त्रालयले मातहतका जिल्लाहरुका पठाएको पत्रको आदेशबाट नाका औपाचरिक रुपमा खुल्ला भइसकेको छ । कोरोना महामारीको कारण विगत डेढ वर्षदेखि औपचारिक रुपमा सीमा बन्द थियो । असोज ५ गते मंगलबार बसेको मन्त्रिपरिषद् बैठकले नेपाल–भारत सीमानाका पूर्ण रूपमा खुल्ला गर्ने निर्णय गरे अनुसार गृह मन्त्रालयले पत्र जिल्लामा पठाएको थियो । नाकामा आवागमन पुनः साबिक सरह सुचारु गर्न सहजीकरणका लागि जिल्ला प्रशासन कार्यालय तयार रहेको पर्साका प्रमुख जिल्ला अधिकारी पिताम्बर घिमिरेले बताए ।

पर्साका प्रमुख जिल्ला अधिकारी घिमिरेले पनि भन्सार विभागले भारतीय सवारीलाई अस्थायी प्रवेशको लागि भन्सार प्रक्रिया सुरु गरेपछि भारतीय सवारी साधन आगमन सुरु हुने जानकारी दिए । वीरगन्ज भन्सार कार्यालयको निर्देशन पर्खेको प्रजिअ घिमिरेको भनाई छ । ‘सरकारको निर्णयपछि नाका खुल्ला भइसकेको हो, अस्थायि रुपमा प्रवेश अनुमति दिइने भारतीय सवारी साधनका लागि हामीसँग माथिको कुनै निर्देशन आएको छैन,’ वीरगञ्ज भन्सार कार्यालयका प्रमुख भन्सार प्रशासक विश्वप्रसाद अर्यालले भने, ‘अर्थ मन्त्रालयबाट भन्सार विभाग हुँदै यस्तो आदेश हामी कहाँ आउने हो, त्यो आएपछि मात्र सवारीहरुको अस्थायी प्रवेशको लागि प्रक्रिया खुल्छ ।’

देशकै सबैभन्दा बढी आवागमन हुने ठूलो नाका वीरगञ्जमा भारतीय सवारीहरुको प्रवेश नहुँदा ब्यापार चौपट भएको भन्दै यसमा अब भन्सार मात्र बाधक देखिएको छ । सिमाना खोलेर भारतीय पर्यटकहरुलाई सहज रुपमा आवतजावत गर्ने वातावरणको सृजना गर्न होटेल तथा पर्यटन ब्यवसायी संघ, पर्साले आवाज उठाउँदै आएको छ ।