वीरगन्ज | सरकारले भ्वाइस अफ नेपालका विजेता किरण गजमेरलाई विमानस्थलबाट फर्काइएको छ । पछिल्लो समय उनी भ्वाइस अफ नेपालको विजेता भएपछि बा-आमालाई भेट्न अमेरिका गएका थिए । गजमेर अमेरिकाबाट कतार हुँदै सोमबार कतार एयरको जहाजबाट नेपाल आएका थिए । उनी भिजिट भिसामा आएर २७० दिनभन्दा बढी बसिसकेका थिए । अध्यागमनको नियम उल्लंघन गरेकाले उनलाई विमानस्थलबाट फर्काइएको त्रिभुवन अन्तरर्राष्ट्रिय विमानस्थल अध्यागमनका प्रमुख सुशील वैद्यले जानकारी दिए ।

गजमेरले आगामी जनवरीदेखि मात्र नेपाल प्रवेश पाउनेछन् । ‘भ्वाइस अफ नेपालको विजेता भएकाले हामीलाई सबै जानकारी थियो,’ उनले भने,’ सम्मान साथ उनलाई फर्काएका हौ ।’गजमेर भिसा अवधिभन्दा बढी बसेका थिए । नेपालले विदेशी नागरिकलाई ‘भिजिट भिसा’ मा न्युनतम १५० दिनभन्दा बढी बस्न नपाउन व्यवस्था गरेको छ ।

नेपाल र अमेरिकाबीच भीषा पारस्पारिकता सम्बन्ध रहेकाले पर्यटन भीषामा दुवै देशका नागरिक एकअर्को मुलुकमा १८० दिन बस्‍न पाउने अध्यागमन विभागका प्रवक्ता झंकनाथ ढकालले जानकारी दिए । अमेरिकाबाहेकका अन्य मुलुकका नागरिकहरुले पर्यटक भीषामा १५० दिन मात्र नेपालमा बस्न पाउँछन् । अमेरिका, क्यानडा र अष्ट्रेलिया लगायतका मुलुकले भुटानी शरणार्थीहरू तेस्रो मुलुक स्थानान्तरण भएका थिए । अमेरिकाले सन् २००६ देखि नेपालबाट भुटानी शरणार्थी लान सुरु गरेको थियो ।