बीरगन्ज । बीरगञ्ज भन्सार तथा राजस्व अनुसन्धान कार्यालय पथलैयाको लापरवाहीले अवैध खसी भित्रीदै छ।सूचना परिचालन तथा प्रहरी कारबाहीको सिलसिलामा अवैधरूपमा खसीहरू भारतबाट भन्सार छली गरी नेपालतर्फ ल्याउँदै गरेको क्रममा पक्राउ परेको छ ।

सूचना प्राप्त भई जिल्ला प्रशासन कार्यालय पर्सा बाट खटिएको टोलीले खोजतलास गर्ने क्रममा राति १० बजे जिल्ला पर्सा बीरगञ्ज महानगरपलिका वडा नं. १४ गण्डकचोकमा बा.१४ च १९९० नम्बरको बोलेरो पिकअपमा लोड गरी काठमाण्डौँतर्फ लाँदै गरेको ५९ वटा खसी फेला पारेको छ ।

कागजातहरू जाँच गर्दा चौपायाको भेटेरिनरी प्रमाणपत्र बारा जिल्लाबाट लिएको देखिएको, फर्मको नाउँमा बिलबिजक हुनुपर्नेमा व्यक्तिको नाउँमा बिल रहेको र खरीद बिल मिति २०७८।०६।०४ गतेको रहेको हुँदा शंकास्पद देखिएकोले चालक जिल्ला सिन्धुली फिक्कल न.पा.वडा नं.१ बस्ने वर्ष २२ को पूर्ण बहादुर सुनुवारलाई उल्लेखित खसी र बोलेरोसहित नियन्त्रणमा लिइएको छ ।

आवश्यक कारवाहीको लागि क्रमशस् बीरगञ्ज भन्सार कार्यालय तथा राजस्व अनुसन्धान कार्यालय पथलैया, बारा पठाउँदा दुवै कार्यालयले बुझ्न नमानी फिर्ता गरिदिएकोले सो खसी, मानिस तथा सवारीसाधन सम्बन्धित धनीलाई जिम्मा लगाईएको छ।