काठमाडौं । यातायात व्यवस्था विभागले आफ्नै सवारीसाधन प्रयोग गरेर सवारी अनुमतिपत्र (लाइसेन्स) का लागि ट्रायल परीक्षा दिन पाइने व्यवस्था खारेज गरेपछि बिचौलियाको बिगबिगी बढ्ने देखिएको छ । विभागले आफ्नै नियमलाई संशोधन गर्दै ट्रायल परीक्षाका क्रममा परीक्षार्थीले आफ्नै सवारी साधन प्रयोग गरेर परीक्षा दिन नमिल्ने व्यवस्था गरेपछि परीक्षार्थीहरू बिचौलियाको मारमा पर्ने भएका हुन ।
विभागले ०७७ चैत १९ गते जारी गरेको ‘सवारी चालक अनुमतिपत्र परीक्षा सञ्चालन कार्यविधि निर्देशिका २०७७’ मा सवारी लाइसेन्सको ट्रायल परीक्षा दिँदा आफ्नै सवारीसाधन प्रयोग गर्न पाउने व्यवस्था गरेको थियो । बिचौलियाहरूको सवारीसाधन प्रयोग गरेर ट्रायल परीक्षाको तयारी र परीक्षा दिँदा लामो समयदेखि ट्रायलको परीक्षा दिने परीक्षार्थीहरू मारमा पर्दै आएका छन् । तर, बिचौलियाको ‘दबाव थेग्न नसकेपछि’ विभागले उक्त व्यवस्था कार्यान्वयमा नआउँदै सशोधनमाफर्त हटाइदिएको छ ।
यातायात व्यवस्था विभागका महानिर्देशक नमराज घिमिरे भने बिचौलियाका कारण उक्त व्यवस्था हटाइएको भन्नेमा सत्यता नभएको बताउँछन् । उनका अनुसार यातायात व्यवस्था कार्यालयहरू र ट्रायल सेन्टरहरूबीच ट्रायल सेन्टरकै सवारी साधनमामात्रै परीक्षा सञ्चालन गराउने सहमति रहेछ ।
‘‘यस विषयलाई सर्वोच्च अदालतले कार्यान्वयन गर्नु भनेर जारी गरेको आदेश आएको छ । त्यसैले आफ्नै सवारी साधनमा ट्रायल दिनुपर्ने पक्ष व्यावहारिक देखिएन । नेपालमा सिकारु लाइसेन्स दिने चलन छैन,” उनले भने, ‘‘ट्रायल दिन आउने मानिसको सवारी साधन ट्रायल सेन्टरसम्म ल्याइपुर्याउँन परीक्षा दिने मानिसले नभई अर्को व्यक्तिले चलाएर आउनुपर्ने हुन्छ । एकजनाले ट्रायल दिने र अर्कोले ल्याउने पुर्याउने गर्नुपर्यो । यसले गर्दा दुईजना व्यक्ति आउनु पर्यो । अर्को व्यक्तिले प्रयोग गरेको लाइसेन्सका आधारमा सवारी साधन चलाउनेहरू बढ्ने भए ।”
आफ्नो सवारीसाधन लिएर ट्रायल परीषाका लागि आउँदा पार्किङको पनि समस्या देखिने महानिर्देशक घिमिरेको भनाइ छ । ‘‘आफ्नो सवारी साधन लिएर ट्रायल सेन्टरमा आउँदा ट्रायल सेन्टर अस्तव्यस्त बन्छ । ट्रायल सेन्टरमा दैनिक ५०० भन्दा बढी परीक्षार्थीहरूको परीक्षा सञ्चालन हुन्छ । यस अवस्थामा आफ्नै सवारी लिएर ट्रायल दिने वातावरण हुँदैन । अर्को कारण भनेको कानुन बमोजिम सवारी लाइसेन्स नभएका मानिसले आफ्नो सवारीमा ट्रायल दिने व्यवस्था छैन । यस्ता विविध कारणले यो नियम तत्काल खारेज गर्न पुगेका हौँ । बिचौलियाको बिगबिगीले होइन,” महानिर्देशक घिमिरेले भने ।
उनी सबै प्रावधानहरूको पूर्ण पालना गरे आफ्नै सवारीमा पनि ट्रायल परीक्षा दिन पाइने बताउँछन् ।
परीक्षार्थीहरूले भने ट्रायल सेन्टरकै सवारी साधनमा ट्रायल परीक्षा दिँदा सवारी साधनमा हात बसिसकेको नहुने र अर्काको सवारी प्रयोग गर्दा फेल भएर पुनः दुईतीनपटक परीक्षा दिनुपर्ने बाध्यता रहेको गुनासो गर्दै आएका छन् ।
विभागको संशोधित निर्देशिकामा ट्रायल परीक्षामा ७० अङ्क ल्याए पास हुने व्यवस्था छ । ट्रायलमा परीक्षामा ७० अङ्क ल्याए पास हुने व्यवस्था लागु भएपनि अर्काको सवारी साधनमा परीक्षा दिँदा फेल सम्भावना बढी रहन्छ । जसले प्रतक्ष वा परोक्ष रूपमा बिचौलियालाई नै पोस्नेछ ।
