वीरगन्ज । एमालेका अध्यक्ष केपी ओली र वरिष्ठ नेता माधवकुमार नेपालबीचको व्यक्तिगत मनमुटावले नेपालको सबैभन्दा ठूलो दलमा विभाजनको रेखा कोरिएको छ । नेपाल अब नेकपा एकीकृत समाजवादीका नेतृत्वकर्ता बनिसकेका छन् ।नेकपा एमालेका निर्वाचित अध्यक्ष केपी शर्मा ओलीको दम्भ अनि ओलीसँग गत महाधिवेसनमा पराजित माधवकुमार नेपालको पार्टी राजनीतिमा शक्तिशाली बन्ने लालच नै एमाले फुटको प्रमुख कारण बनेको छ । पछिल्लो समय ओलीको चाहना सधैँ नेता नेपाल बीनाको एमाले बनाउने थियो । नेता नेपाल भने एमालेमा ओली बराबरको हैसियत खोज्दै थिए । सर्वोच्च अदालतले नेकपा विघटनको फैसला गर्नुभन्दा अगाडि नेता नेपाल र तत्कालिन नेकपाका अर्का अध्यक्ष पुष्पकमल दाहालले ओलीलाई सत्ताबाट हटाउने योजना बुनेका थिए । तर, ती दुई नेताको रणनीति बुझेका चतुर नेता ओलीले बरु नेपाल र दाहालको सहकार्य तोड्ने अनेकौँ प्रयत्न गरे ।
नेपाल र दाहालको दबाब सहनुभन्दा मुलुकलाई मध्यावधि निर्वाचनमा धकेल्नु ओलीले आफ्ना लागि हितकर देखे । तर सर्वोच्च अदालतले ओलीको संसद विघटन गर्ने निर्णयलाई दुई पटक अस्विकार ग¥यो । त्यही बीचमा अदालतले नेकपा नै खारेज गरेर नेकपा माओवादी केन्द्र र नेकपा एमाले ब्युताएपछि नेपाल र दाहाल फरक धारमा उभिन बाध्य भए । तर, पनि ती दुई बीच सहकार्यमा कमी आएन । नेपालले आफ्नै दलका अध्यक्षलाई सत्ताच्युत गराउन भूमिका खेले । संसदीय राजनीतिमा विरलै देखिने दुश्कार्य गरेका नेपालले त्यसलाई संविधान ट्रयाकमा ल्याउने प्रयासका रुपमा परिभाषित गरे । समय क्रमसँगै नेकपा एमालेमा नेता नेपाल नभए आजीवन अध्यक्ष हुन पाउने ओलीको सोच बलियो बन्दै गयो ।पार्टीमा शक्तिशाली बन्दै गएका ओली कै कारण आफू थप कमजोर बन्ने अनुमान नेता नेपालको रह्यो । एमालेमा भविष्य नदेखेकै कारण नेपालले ओलीसँग अलग भएर अन्य दलसँगको सहकार्यलाई महत्व दिए भने ओली जसरी भएपनि नेपाललाई एमालेमा फर्कनबाट रोक्ने अभियानमा लागे । त्यही कारण दुवैले एकले अर्कालाई दोषी देखाउन कुनै कसरत बाँकी राखेनन् । दुवैको बोली क्षुद्रताको हदसम्म गिर्न थाल्यो ।
दोस्रो तहका नेताहरुले एमालेको एकता जोगाउन कुनै कसर बाँकी राखेनन् । माधव पक्ष र ओली पक्षका दोस्रो तहका नेताहरुले शिर्ष नेताहरुको दम्भका कारण दिशाहिन बनेको पार्टीलाई सही मार्गमा ल्याउन एकताका लागि १० बुँदे प्रस्ताव पनि बनाए । ओलीले सहजै स्विकारेको त्यो प्रस्तावलाई माधव नेपालले भने ठाडै अस्विकार गरे । जसले गर्दा नेता नेपाल एमालेको बागडोर हातमा नआए अर्को दल गठन गर्ने मनस्थितिमा पुगे । अब कम्युनिष्ट तथा बाम एकताको सम्भावना रहे पनि नेपालले ओलीसँग भने एकता हुन नसक्ने आशय व्यक्त गरेका छन् । यसअघि नै ओलीले पनि नेपालबाहेकको एकता हुने बताएका थिए ।लामो समयपछिको विवादले अन्ततः एमालेलाई विभाजनमा पुर्याएर अवतरण गरेको छ । तर टुटफुटको राजनीति चलिरहने नेपालमा पुनः अहिले छुट्टिएका नेताहरु एकसाथ नहोलान् भन्न सकिदैन । एमालेको अहिलेको विभाजन वास्तवमा दुई नेताको दम्भको जित र कार्यकर्ताको विश्वासको हारका रुपमा इतिहासले चिन्ने छ ।
