जनकपुरधाम | प्रदेश नं. २ का एक राज्यमन्त्रीले पदमुक्त भएको एक महिना बितिसक्दा पनि सेवा सुविधा भने लिइरहेका छन्।सरोज सिंह कुशवाहाले आन्तरिक मामिला तथा सञ्चार राज्यमन्त्री पदबाट राजीनामा दिएको एक महिना बितिसक्दा पनि आफूले प्रयोग गर्ने गाडी मन्त्रालयलाई फिर्ता गरेका छैनन्। उनले गत साउन २ गते राजिनामा दिएका थिए।राज्यमन्त्रीको रुपमा रहँदा उनलाई गाडी दिइएको थियो भने उनको निवासमा सुरक्षाको लागि लगाइएको सीसी क्यामेरासमेत फिर्ता गरेका छैनन्।
राज्यमन्त्री हुँदा उनलाई दिइएको एउटा गाडी र सुरक्षाको लागि निवासमा लगाइएको पाँच थान सीसी क्यामेरा फिर्ता नगरेको आन्तरिक मामिला तथा सञ्चार मन्त्रालयले जनाएको छ।पूर्व राज्यमन्त्री कुशवाहालाई सामानहरु फिर्ता गर्न पटक–पटक ताकेता गरेपनि उनले फिर्ता गर्नुमा चासो देखाएका छैनन्। मन्त्रालयका सचिव विरेन्द्र यादवले कुशवाहाले एउटा गाडी अहिलेसम्म फिर्ता नगरेको बताए।
पूर्वराज्यमन्त्री कुशवाहाले भने आफू राज्यमन्त्री पदबाट हटेलगत्तै सबै समानहरु फिर्ता गरेको दावी गरे।उनले भने, ‘मैले राजीनामा दिएलगतै सबै सामान फिर्ता गरेछु। यदि मसँग कुनै समानहरु बाँकी छ भने मन्त्रालयलाई पत्र पठाएर कुन–कुन सामान मसँग छ भनेर पठाओस्।’नेकपा माओवादी केन्द्रलाई सरकारमा सहभागि गराउनको लागि जसपाले आन्तरिक मामिला तथा सञ्चार मन्त्री र राज्यमन्त्रीलाई सरकारबाट फिर्ता बोलाएको थियो।
