वीरगञ्ज । सुदूरपश्चिम प्रदेश सरकारले चाँडै नै बाल अधिकार सम्बन्धी नियमावली र बाल सहभागिता सम्बन्धी कार्यविधि तयार गर्ने भएको छ ।
धनगढीमा भएको प्रदेश स्तरीय बाल सहभागिता कार्यविधि सम्बन्धी अन्तरक्रिया तथा सराकारवालाहरूको सुझाव संकलन कार्यक्रममा बोल्दै सामाजिक विकासमन्त्री लालबहादुर खड्काले असोजसम्म बालबालिका सम्बन्धी नियमावली र बाल सहभागिता सम्बन्धी कार्यविधि बनाइसक्ने बताए ।
प्रदेश सरकारले यसअघि नै बालबालिका ऐन जारी गरिसकेको छ ।
उक्त कार्यक्रममा बोल्दै सामाजिक विकास राज्यमन्त्री मनाकुमारी साउदले आफू बाल अधिकारका लागि बनेका बाल क्लवको अनुभव सम्हालेर राजनीतिमा सक्रिय भइरहेको बताइन् । बालअधिकार बारे जानकारी दिन र बालबालिकाको भविष्य राम्रो बनाउन बालक्लवहरूले राम्रो भूमिका खेल्न सक्ने चर्चा गर्दै उनले बाल क्लबलाई सक्रिय बनाउन र बाल सहभागिता प्रवर्द्धन गर्न आवश्यक नीतिहरू तय हुनु पर्नेमा जोड दिइन् ।
साथै उक्त कार्यक्रममा सुदूरपश्चिम प्रदेशका सामाजिक विकासमन्त्री लाल बहादुर खड्काले प्रदेशमा आवश्यक बालबालिका सम्बन्धी नियमावली, कार्यविधि तथा केही नीतिहरू आवश्यक भएको र उक्त कार्यका लागि बाल अधिकारको क्षेत्रमा क्रियाशील संघ संस्थाहरूसँग समन्वय गर्ने विचार व्यक्त गरे ।
मन्त्री खड्का र राज्यमन्त्री साउदलाई बाल अधिकारका सवालमा केन्द्रित रहेर ध्यानाकर्षण पत्र पनि बुझाइएकाे छ ।
कार्यक्रममा विभिन्न संघ, संस्था, नागरिक समाज, विकास साझेदार संस्था, पत्रकार र बाल क्लबका अगुवाहरूको सहभागिता रहेको थियो ।
