वीरगञ्ज । वीरगञ्ज महानगरपालिकाले पुनः डस्टबिन वितरण अभियानलाई निरन्तरता दिने भएको छ ।
वीरगञ्ज महानगरपालिकाभित्रको फोहोरमैला वर्गीकरणका लागि दोस्रो चरणमा वीरगञ्ज महानगरपालिका वडा नम्बर १, २, ३, ११, १३, १४, १५ र १६ का सम्पुर्ण घरधुरीमा डस्टबिन वितरण गरिने नगरप्रमुख विजय कुमार सरावगीले बताए ।
वीरगञ्जलाई सफा र सुन्दर शहरको रुपमा विकास गर्ने अभिप्रायले कुहिने फोहोरका लागि हरियो र नकुहिने फोहोरका लागि रातो डस्टविन वितरण गरिने सरावगीको भनाई छ । उनका अनुसार व्यक्ति आफैले सफा नगरेसम्म र आफ्नो घरको फोहोरको व्यवस्थापन आफै नगरेसम्म नगरपालिका मात्रैले सफा बनाउन असम्भव छ ।
निःशूल्क रुपमा डस्टबिन वितरणका साथै जनचेतनामुलक कार्यक्रम गरिने र तेस्रो चरणमा बाँकी रहेका वडामा पनि अभियानलाई निरन्तरता दिने सरावगीले यात्राडेलीसँगको संवादमा भने । वीरगञ्ज महानगरलाई स्वच्छ र सफा बनाउने प्रयासलाई सफल पार्न सहयोग र सहकार्य गर्न पनि मेयर सरावगीले अपिल गरेका छन् ।
