वीरगञ्ज।। शेरबहादुर देउवा प्रधानमन्त्री बनेको एक महिना पुरा भएको छ । अहिलेसम्म प्रधानमन्त्री देउवासँगै अन्य चार मन्त्री र एकजना राज्यमन्त्री मात्रै नियुक्त भएका छन् ।
एक महिनासम्म सरकारलाई पूर्णता दिन नसक्दा प्रधानमन्त्री देउवा नेतृत्वको- गठबन्धन सरकारले निराश बनाएको छ । सरकारलाई नै पूर्णता दिन नसकेपछि सरकारको पहिलो गाँसमा नै ढुंगा लागेको विश्लेषण हुन लागेको छ । विहिबार र शुक्रबारको प्रतिनिधि सभाको बैठकमा काँग्रेसकै सांसदहरुले समेत सरकारले पूर्णता नपाएको विषय उठाएका छन् । उनीहरुले काँग्रेसलाई असफल बनाउन गठबन्धनमा रहेका दलहरुले सरकार विस्तारमा सहयोग नगरेको त होइन भन्दै प्रश्न समेत उठाएका छन् ।
तर पछिल्ला घटनाक्रमले सरकारको विस्तार अझैँ केहि दिन पछाडी जाने संकेत देखिएको छ । यसको संकेत सत्तारुढ गठबन्धनको प्रमुख घटक माओवादी केन्द्रका अध्यक्ष पुष्पकमल दाहाल प्रचण्डले दिएका छन् । प्रचण्डले शुक्रबार आफ्नो पार्टीको स्थायी कमिटी बैठकमा तत्काल मन्त्रिपरिषद् विस्तार नहुने पार्टी भित्र ब्रिफींङ गरेका छन् । स्थायी कमिटी बैठकमा नेताहरूले मन्त्रिपरिषद विस्तारको विषय उठाएपछि प्रचण्डले एमालेको नेपाल पक्षलाई पर्खिदा नै मुख्यरुपमा ढिला भएको जानकारी दिएका थिए । प्रचण्डले पार्टीहरुमा आन्तरिक समस्या भएको भन्दै अझै केहि दिन एमालेको नेपाल पक्षलाई पर्खिने सम्भावना रहेको बताएका छन् ।
कुन कुन पार्टीमा छ त विवाद ?
अहिले विश्लेषण गर्दा गठबन्धनका सबै पार्टीमा सरकारमा आने विषयमा किचलो देखिएको छ । प्रधानमन्त्री देउवाकै दल काँग्रेस महाधिवेशनको- दाउपेचमा फसेकाले मन्त्री छान्ने विषय दिनप्रतिदिन पेचिलो हुदै छ । गुट उपगुटले भागबण्डा मागेर महाधिवेशनका लागि बार्गेनिंग भइरहेकाले प्रधानमन्त्री देउवा अप्ठ्यारोमा परेका छन् । त्यसैले पनि उनको प्राथमिकता अहिले सरकार विस्तार भन्दा पार्टीको महाधिवेशन भएको छ । भदौ २३ भित्र महाधिवेशन गर्नै पर्ने संबैधानिक बाध्यता रहेकाले पनि उनको प्राथमिकता महाधिवेशन भएको छ ।
त्यस्तै सरकार विस्तारमा दोस्रो अप्ठ्यारो एमालेको माधवकुमार नेपाल पक्षले गर्दा भएको छ । एमालेको विवाद मिल्ने तर्फपनि ठोस रुपमा अगाडी नबढेको र फुटने तर्फपनि स्पष्ट रुपमा अगाडी नबढेको अवस्थाले सरकार विस्तारमै असर गरेको छ । खासगरी प्रचण्ड नेपाल पक्षलाई सरकारमा सामेल गराएर एमाले अध्यक्ष केपी शर्मा ओलीलाई थप अप्ठ्यारोमा पार्ने रणनीतिमा लागेकोले पनि ढिला भएको बुझिएको छ ।
त्यस्तै गठबन्धनको अर्को घटक जसपामा पनि मन्त्री छान्ने विषयमा विवाद रहेको छ । अध्यक्ष उपेन्द्र यादव आफ्नै नेतृत्वमा सरकारमा सामेल हुन चाहेपनि डा. बाबुराम भट्टराईलगायतका नेता भने अन्य नेताको नेतृत्वमा सरकारमा जानुपर्ने पक्षमा रहेका छन् । जसपामा पनि मन्त्री छान्ने विषयमा एकमत नभएकाले सरकार विस्तारमा ढिला भएको देखिएको छ ।
त्यस्तै माओवादी केन्द्रमा पनि मन्त्री बन्न आकांक्षा राख्नेको- संख्या धेरै भएपछि अध्यक्ष प्रचण्डले नै केहि दिन अघि सार्बजनिक कार्यक्रममा नै मन्त्री छान्न मुश्किल भएको बताएका थिए । माओवादी केन्द्रमा नारायणकाजी श्रेष्ठको नेतृत्वमा सरकारमा सामेल हुने वा कृष्णबहादुर महराको नेतृत्वमा जाने भन्ने विषयमा विवाद रहेको छ ।
यसरी गठबन्धनका हरेक दल र समुहमा विवादका कारण सरकारले एक महिनासम्म पूर्णता पाउन नसकेको देखिएको छ भने यो अझैँ केहि दिन लाग्ने देखिन्छ । यसरी यसअघि केपी शर्मा ओली नेतृत्वको सरकार हुदा करिब एक महिना नै मन्त्री विहिन बनेका मन्त्रालय अहिले देउवा प्रधानमन्त्री बनेपछि पनि एक महिना मन्त्री विहिन बनेका छन् ।
