बारा । नेपालको कानुनले जघन्य अपराधको रुपमा परिभाषित गरेको बोक्सि प्रथाले अझै हाम्रो समाजमा कयौ बेसाहारा महिलाहरुको जिवन कष्टकर बनाईरहेको छ । शहरी क्षेत्रमा शिक्षित मानसिकता बढेसंगै कुप्रथा र कुसंस्कृती हटेको जस्तो देखीएपनि अझैसम्म ग्रामिण भेगका जनतामा चेतनास्तर बिकाश भएको देखीदैन ।

केहिदिन अघि मात्रै बाराको पचरौता नगरपालीका ५ बेल्दारीमा बोक्सिको आरोप लगाई एक महिलालाई निर्घात कुटपिट गरीएको खबर जानकारीमा आएको छ । गत २८ गते बिहिबार सांझ करिब ६ बजेको स्थानिय मालतीदेवी महतोलाई उनकै परिवारका अन्य महिलाहरुले बोक्सिको आरोप लगाएर मलमुत्र समेत खुवाउने प्रयास गरेका थिए ।

घरमै काम गरिरहेको अवस्थामा उनलाई जबरजस्ति मलमुत्र खुवाउन खोज्दा झडप भएको पिडित महतोले जानकारी दिनुभयो । झडपमा ५० वर्षीय मालती देवी र उनकी २० वर्षीय छोरी अन्जली कुमारी घाईते भएका हुन् । उनिहरुको बाया हात र पेटमा बढी चोट लागेको पिडित महतोको भनाइ रहेको छ ।

उनलाई आफ्नै जेठानी र देउरानीले वडाध्यक्ष लक्ष्मि यादवको ईशारामा बोक्सि आरोप लगाई मार्न खोजेको पिडितले आरोप लगाउनुभएको छ ।

यता वडाध्यक्ष यादवले आफुमाथी लगाईएको आरोप निराधार र झुटो रहेको बताउनुभएको छ । घटनाको दिन आफु दिनभरी जिल्ला प्रहरी कार्यालय र मालपोत कार्यालयमा रहेकाले घटनाबारे अनविज्ञ रहेको यादवले स्पिस्टिकरण दिनुभयो ।